बेनी — तिहार नजिकिएसँगै म्याग्दीको बेनी बजारमा झिनिया बनाउने उद्यमीहरूको चहलपहल बढेको छ। चाडपर्वमा माग ह्वात्तै बढ्ने भएकाले उनीहरू परिवारका सदस्य र कामदार परिचालन गरेर उत्पादनमा व्यस्त छन्।
बेनी नगरपालिका–७, मङ्गलाघाटकी कल्पना श्रेष्ठ यतिबेला बिहानदेखि बेलुकासम्म झिनिया बनाउनमै लागेकी छन्। उनका छोराछोरी विदेशमा भएकाले श्रीमान्सँग मिलेर उनले यो व्यवसाय धानेकी छन् र माग थेग्न एक जना कामदार पनि राखेकी छन्। दसैं–तिहारको सिजनमा झिनिया बेचेर तीनदेखि चार लाख रुपैयाँसम्म आम्दानी हुने उनको अनुभव छ। बेनी बजार, म्याग्दीका गाउँबस्ती, पर्वत, बागलुङ हुँदै पोखरासम्म उनको उत्पादन पुग्छ।
मङ्गलाघाटकै हेमबहादुर पुनको घरमा पनि यतिबेला सबै जना झिनियाकै काममा छन्। परिवारका १० सदस्य मिलेर दैनिक एक बोरा चामलको पिठो बराबरको झिनिया तयार गर्छन्। चाडपर्वमा दुईदेखि तीन लाख रुपैयाँसम्मको बिक्री हुने उनले बताए। पछिल्ला दुई महिनादेखि परिवारका सबै सदस्य यही काममा लागेका छन्।
२५ वर्षदेखि झिनिया बनाउँदै आएकी टकसरा रानाको अनुभव पनि उस्तै छ। बेनी बजार, म्याग्दीका ग्रामीण भेग र पोखराबाट मात्र होइन, विदेशबाट समेत माग आउने गरेको उनले सुनाइन्। दुई वर्षअघि अस्ट्रेलियाबाट आएको २५ हजार रुपैयाँ बराबरको मागमा उनी १३ हजार रुपैयाँ बराबरको मात्र पठाउन सकेकी थिइन्।
झिनियालाई झिलिङ्गा रोटी पनि भनिन्छ। चामलको पिठो पकाएर मेसिनमा पेलिन्छ, त्यसपछि निस्कने चाउचाउजस्ता त्यान्द्रालाई दुई दिन घाममा सुकाएपछि झिनिया तयार हुन्छ। तीन जनाले एक दिनमा ३५० वटाभन्दा बढी बनाउन सक्ने उद्यमीहरू बताउँछन्। तयार झिनियालाई घ्यू वा तेलमा तारेर खान सकिन्छ र बजारमा १२ वटाको मूल्य १४० देखि १५० रुपैयाँसम्म पर्छ। मङ्गलाघाटमा मात्र करिब २० जना झिनिया उद्यमी रहेको म्याग्दी उद्योग वाणिज्य सङ्घका निवर्तमान अध्यक्ष बेलबहादुर कटुवालले जानकारी दिए।
