मुम्बई — निर्देशक नितेश तिवारीको पौराणिक एक्सन फिल्म ‘रामायण : पार्ट १’ ले मिश्रित प्रतिक्रिया पाए पनि बक्स अफिसमा आफ्नो पकड बलियो बनाएको छ। फिल्मको पहिलो सोमबारको कमाइ भारतीय सिनेमाका पाँच सर्वाधिक कमाउने फिल्महरूको पहिलो सोमबारको कमाइभन्दा माथि पुगेको छ।
फिल्मका विभिन्न पक्षको प्रशंसा भइरहेका बेला खलनायक रावणको भूमिकामा कन्नड सुपरस्टार यशको अभिनयले विशेष ध्यान तानेको छ। रावणको रूप धारण गर्न यशले निकै भारी पहिरन बोक्नुपरेको थियो। फिल्मकी पोसाक डिजाइनर सनिया सरधारियाका अनुसार रावणका रूपमा यशले लगाएका केही पोसाकको तौल करिब ३३ किलोसम्म पुगेको थियो।
सनियाका अनुसार यशका अधिकांश पोसाक १६ देखि २० किलोका थिए भने केही विशेष पहिरन ३० किलोभन्दा माथिका थिए। उनको मुकुट मात्रै १.८ किलोको थियो। लंकासँग सम्बन्धित रावणको मुख्य रूप, उनको विवाहको पहिरन र शूर्पणखाको विवाहमा लगाएको पहिरन ३० देखि ३३ किलोको रहेको डिजाइनरले बताएकी छन्। भारी पहिरन र गहनाका बाबजुद यशले उत्कृष्ट अभिनय प्रस्तुत गरेका छन्।
रावणको वैभव झल्काउन गहनामा पनि विशेष मेहनत गरिएको छ। ट्राइब आम्रपालीका क्रिएटिभ निर्देशक तथा प्रमुख कार्यकारी तरङ्ग अरोराका अनुसार सुनको देशका राजा भएकाले रावणको चरित्रमा अत्यधिक ऐश्वर्य देखाउनुपर्ने चुनौती थियो। शिवका ठुला भक्त भएकाले रावणका गहनामा सर्प, राक्षसको अनुहार, जनावरका आकृति र त्रिशूलजस्ता प्रतीक प्रयोग गरिएको छ। एउटै पहिरनभित्र पनि उनका दुई हातका गहनामा फरकफरक बनावट राखिएको छ।
नमित मल्होत्राको निर्माणमा बनेको फिल्ममा रणवीर कपूरले राम, साई पल्लवीले सीता, रवि दुबेले लक्ष्मण र सन्नी देओलले हनुमानको भूमिका निभाएका छन्। फिल्मको संगीत हान्स जिमर र एआर रहमानले तयार पारेका छन्।
