तिहारको अन्तिम दिन आज भाइटीकामा सार्वजनिक यातायात निकै कम सञ्चालन हुने भएकाले सशस्त्र प्रहरी बल, नेपालले काठमाडौं उपत्यका र भक्तपुरमा निःशुल्क बस सेवा चलाएको छ। सर्वसाधारण यात्रुलाई आवतजावतमा सहजता दिन बिहान ८ बजेदेखि बेलुकी ५ बजेसम्म तीनवटा बस सञ्चालनमा राखिएको हो। निःशुल्क सेवाका लागि यात्रुले कुनै भाडा तिर्नुपर्ने छैन।
सशस्त्र प्रहरी बलको प्रधान कार्यालयबाट छुट्ने पहिलो बस बालाजु, नयाँ बसपार्क, कोटेश्वर, सातदोबाटो र बल्खु हुँदै विभिन्न स्थानका यात्रुलाई सेवा दिनेछ। त्यही कार्यालयबाट छुट्ने दोस्रो बस सीतापाइला, कलंकी, बल्खु, कोटेश्वर र नयाँ बसपार्क हुँदै चल्नेछ।
तेस्रो बस स्वयम्भूस्थित प्रधान कार्यालयबाट भक्तपुरसम्म चल्नेछ। उक्त बस स्वयम्भू, कलंकी, बानेश्वर, कोटेश्वर, पेप्सिकोला, सानोठिमी, पुरानोठिमी, सल्लाघारी र लोकन्थली हुँदै फेरि बानेश्वर, कलंकी र स्वयम्भू फर्कनेछ।
चाडपर्वको बेला सार्वजनिक सवारीको अभावले यात्रुले भोग्नुपर्ने कठिनाइ घटाउन बलले यस्तो सेवा निरन्तर चलाउँदै आएको सशस्त्र प्रहरी बलका सहप्रवक्ता प्रहरी नायब उपरीक्षक शैलेन्द्र थापाले जानकारी दिए। दसैँका बेला पनि यस्तै निःशुल्क बस सेवा सञ्चालन गरिएको थियो।
