खोटाङ — हलेसी तुवाचुङ नगरपालिका–६ को मङ्गलटारमा गएराति करिब नौँ बजे विद्युत्को चुहावटबाट लागेको आगोले दुई घर पूर्णरूपमा जलेर नष्ट भएका छन् । घरमा जडान गरिएको बिजुलीको फल्ट हुँदा स्थानीय कृष्णकुमार राईका दुवै घरमा आगलागी भएको हो ।
राई वैदेशिक रोजगारीका लागि संयुक्त अधिराज्यमा रहेका छन् । उनको घरमा श्रीमती तारा र कान्छा छोरा मात्र बस्दै आएका थिए । जस्तापाताको छाना र ढुङ्गा–माटोले बनेका दुईतले घरमा विद्युत्को खराबीबाट आगो सल्किएको प्रहरीको प्रारम्भिक अनुमान छ ।
स्थानीय जनप्रतिनिधि, गाउँले र प्रहरी टोली मिलेर आगो नियन्त्रणमा लिएका थिए । राईका जेठा छोरा रम्बोहाङ राईका अनुसार आगलागीमा २० हजार रुपैयाँ नगद, लत्ताकपडा, भाँडावर्तन, खाद्यान्न र महत्वपूर्ण कागजातसमेत जलेर नष्ट भएका छन् । घटनाको विस्तृत विवरण आउन बाँकी रहेको जिल्ला प्रहरी कार्यालय खोटाङका प्रमुख प्रहरी नायब उपरीक्षक प्रकाश बुढाथोकीले जानकारी दिए ।
