काठमाडौँ — भारतको गुजरातमा यही अक्टोबर २२ देखि ३१ तारिखसम्म हुने पश्चिम एसियाली युवा चेस च्याम्पियनसिप २०२६ मा भाग लिन १८ सदस्यीय नेपाली टोली आज बिहान स्वदेशबाट प्रस्थान गरेको छ । त्रिभुवन अन्तर्राष्ट्रिय विमानस्थलमा नेपाल बुद्धिचाल महासङ्घका प्रवक्ता राजु ताम्राकारले खेलाडी तथा टोलीका सदस्यलाई बिदाइ गरेका हुन् ।
महासङ्घकी केन्द्रीय सदस्य नीता सैंजुको नेतृत्वमा रहेको टोलीमा विभिन्न उमेर समूहका ११ खेलाडी, पाँच अभिभावक र एक निर्णायक समावेश छन् । छात्रतर्फ युवा–८ मा सुनव ओझा, युवा–१० मा शुभाङ्ग प्रधान, युवा–१२ मा अग्रिम सैंजु तथा युवा–१४ मा आयुष भण्डारी र प्रबिर केसीले प्रतिस्पर्धा गर्नेछन् । छात्रातर्फ युवा–१० मा अग्रता आचार्य, युवा–१२ मा निहाना श्रेष्ठ, युवा–१४ मा उज्जिवनी कँडेल र युवा–१६ मा नेलिसा ओझा खेल्नेछिन् ।
टोलीमा अभिभावकका रूपमा भावना अमात्य, सरस्वती पौडेल, सिन्दिरा जोशी, बन्दना खड्का र नबिना कुटुवाल तथा निर्णायकका रूपमा प्रबिश प्रजापति रहेका छन् । प्रवक्ता ताम्राकारका अनुसार यो प्रतियोगिता नेपाली युवा खेलाडीले अन्तर्राष्ट्रिय मञ्चमा प्रतिभा देखाउने र क्षेत्रीय प्रतिस्पर्धाबाट अनुभव बटुल्ने महत्वपूर्ण अवसर हो ।
