काठमाडौं — नेपाल प्रिमियर लिग (एनपीएल) को तेस्रो संस्करणको उद्घाटन खेलका सम्पूर्ण टिकट बिक्री भएका छन्। नेपाल क्रिकेट संघ (क्यान) ले पहिलो खेलका लागि उपलब्ध सबै टिकट बिकिसकेको जनाएको छ।
अक्टोबर २६ देखि नोभेम्बर २१ सम्म कीर्तिपुरस्थित त्रिवि क्रिकेट मैदानमा हुने प्रतियोगिताको पहिलो दिन नै मैदान पूर्ण भरिभराउ हुने भएको छ।
केही दिनअघि मात्र तेस्रो संस्करणका खेलका टिकट मूल्य सार्वजनिक भएर इसेवामार्फत बिक्री सुरु भएको थियो। मूल्य घोषणा भएलगत्तै क्रिकेटप्रेमीमा टिकटप्रतिको उल्लेखनीय चासो देखिएको छ।
तेस्रो संस्करणको एनपीएलले अन्तर्राष्ट्रिय क्रिकेट परिषद् (आइसिसी) बाट लिस्ट ‘ए’ टी–२० दर्जा पाइसकेको छ, जसले प्रतियोगिताको स्तर र आकर्षण थप बढाएको छ। यस संस्करणमा विदेशी खेलाडीहरूको पनि उल्लेखनीय उपस्थिति रहनेछ।
देशको सबैभन्दा ठूलो फ्रेन्चाइज क्रिकेट प्रतियोगिताप्रतिको यो प्रारम्भिक उत्साहले नेपालमा क्रिकेटप्रतिको बढ्दो लोकप्रियता पुनः पुष्टि गरेको छ।
