बाँकेको जानकी गाउँपालिका–५ बकसपुरस्थित अम्बे स्टिल सरिया कम्पनीभित्र रहेको फर्नेस आयलको ट्याङ्कीमा आगलागी हुँदा एक करोड ५६ लाख रुपैयाँ बराबरको क्षति भएको छ । बिहीबार बिहान करिब १ः३० बजे फलाम इन्जिनमा प्रयोग हुने तेल भण्डारण गरिएको ट्याङ्कीमा विद्युत् लाइन सर्ट हुँदा आगो लागेको हो ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतीतसिंह राठौरका अनुसार आगलागीको जानकारी पाउनासाथ इलाका प्रहरी कार्यालय खजुराखुर्दबाट प्रहरी टोली घटनास्थलमा खटिएको थियो । नेपाल प्रहरी, स्थानीयवासी र दमकलको सहयोगमा एक घण्टाभित्र आगलागी पूर्ण रूपमा नियन्त्रणमा लिइएको थियो ।
प्रारम्भिक विवरणअनुसार क्षति एक करोड ५० लाखभन्दा बढी अर्थात् करिब एक करोड ५६ लाख बराबरको पुगेको छ । घटनाको थप विवरण संकलन भइरहेको प्रहरीले जनाएको छ ।
