बडादसैँको मुख्य दिन विजयादशमीको भोलिपल्ट अर्थात् एकादशीका दिन आज पनि मान्यजनकहाँ पुगेर टीका र जमरा थाप्ने क्रम जारी छ । बुधबार मुख्य दिन मनाइए पनि हिजो समय अभावका कारण टीका थाप्न छुटेका नागरिकहरू आज आफन्त र मान्यजनकहाँ गएर प्रसाद स्वरूप रातो टीका र जमरा लगाइरहेका छन् । टीका समृद्धिको प्रतीक रातो रंग र जमरा शुभ साइतको प्रतीक मानिने भएकाले मान्यजनबाट लगाउने प्रचलन कोजाग्रत पूर्णिमासम्म नै चलिरहन्छ ।
हिजो घरैमा टीका लगाएका कतिपय सर्वसाधारण आज काठमाडौँबाहिर रहेका आफन्त र मान्यजन भेट्न हिँडेका छन् । काठमाडौँबाट लामो तथा छोटो दूरीका सवारीसाधन फाट्टफुट्ट सञ्चालन भइरहेकाले टीका थाप्न बाहिरिनेहरूले यात्रा गरिरहेका छन् । उता देशका विभिन्न भूभागबाट मानिसहरू काठमाडौँ आइरहेकाले उपत्यकामा चहलपहल केही बढेको छ ।
टीका लगाउने र लगाइदिने, अनि आशीर्वाद लिने र दिने क्रम आज पनि जारी रहेकाले दसैँको रमझम अझै कायम रहेको देखिन्छ ।
