दिवंगत बलिउड अभिनेता सुशान्त सिंह राजपुतको निधनपछि उनका प्रशंसक र सिनेजगतमा उठेका प्रश्न आजसम्म पनि सेलाएका छैनन्। यसैबीच बलिउड अभिनेत्री स्मिता जयकरले यस विषयमा नयाँ खुलासा गरेकी छन्।
सिद्धार्थ कन्ननसँगको पोडकास्टमा स्मिताले आफूले सुशान्तलाई मुम्बईस्थित हिन्दुजा अस्पतालमा भेटेको र त्यसबेला उनी डिप्रेसनको उपचार गराइरहेको बताइन्। उनका अनुसार सुशान्तलाई सहयोग पुर्याउन रिया चक्रवर्तीले आफूसँग सम्पर्क गरेकी थिइन्, जसपछि आफूले उनलाई निको हुन सहयोग गर्ने उद्देश्यले उपचारात्मक सत्रसमेत दिएकी थिइन्।
“त्यतिबेला सुशान्तलाई आत्महत्याका विचार आउँथे। मैले उनलाई सहयोग गर्ने प्रयास गरेँ। उनले मेरो आश्रममा आउने वाचा पनि गरेका थिए,” स्मिताले भनिन्।
सुशान्तसँग जोडिएका लागूऔषधका चर्चाबारे स्मिताको धारणा फरक छ। उनीसँगको भेटमा सुशान्त कुनै पनि लागूऔषधको प्रभावमा रहेको आफूलाई नलागेको र उनी नशाको लतमा परेको व्यक्तिजस्तो पनि नलागेको उनले बताइन्। डिप्रेसनका लागि भने उनी औषधि सेवन गरिरहेका थिए।
सुशान्त सिंह राजपुतको निधन सन् २०२० को जुन १४ मा भएको थियो। लामो समय बितिसक्दा पनि उनको मृत्युलाई लिएर चासो र बहस जारी छन्।
