राष्ट्रिय प्रजातन्त्र पार्टीका पूर्वअध्यक्ष कमल थापाले अर्थमन्त्री डा. स्वर्णिम वाग्लेले भारतको राजधानी दिल्लीमा नेपाल–भारत सम्बन्धबारे दिएको अभिव्यक्तिमाथि असहमति जनाएका छन्। शनिबार सामाजिक सञ्जाल फेसबुकमार्फत आफ्नो धारणा सार्वजनिक गर्दै थापाले उक्त अभिव्यक्ति नेपाली राष्ट्रियताको अवमूल्यन भएको बताएका हुन्। उनले यस विषयमा सरकारको स्पष्ट धारणा पनि माग गरेका छन्।
थापाका अनुसार नेपालको राष्ट्रवाद कुनै खास मुलुकको विरोधमा उभिएको छैन। विदेशी मञ्चमा पुगेर भारतविरोधी राष्ट्रवादको युग सकिएको बताउनु राष्ट्रिय सरोकारका विषयलाई कमजोर बनाउने काम भएको उनको तर्क छ। सानो समूहका केही अपवादमूलक भनाइलाई टेकेर समग्र मुलुकको राष्ट्रिय भावनालाई साँघुरो रूपमा देखाउनु पूर्वाग्रह भएको उनले बताएका छन्।
नेपालको राष्ट्रियता सार्वभौमिकता र नेपाली जनताको हितको रक्षामा केन्द्रित रहेको थापाको भनाइ छ। भारतसँग समानता र सम्मानमा आधारित सम्बन्ध चाहेको स्पष्ट पार्दै उनले सीमा मिचिने, डुबान हुने वा नाकाबन्दीजस्ता घटनामा आवाज उठाउनु भारतविरोध नभई राष्ट्रप्रतिको निष्ठा भएको बताएका छन्।
वाग्लेले अघि सारेको भनिएको ‘मुनरो डक्ट्रिन’सँग पछिल्लो भनाइको सम्बन्ध छ कि भन्ने प्रश्न पनि थापाले उठाएका छन्। जिम्मेवार पदमा रहेका व्यक्तिले यसबारे जवाफ दिनुपर्ने उनको माग छ। ‘के सरकारको धारणा यही हो ?’ भन्दै उनले सरकारलाई प्रश्न गरेका छन्।
