सुर्खेत । कर्णाली प्रदेशमा सवारी कारबाहीबाट १२ दिनको अवधिमा १२ लाख रुपैयाँभन्दा बढी राजस्व संकलन भएको छ । ट्राफिक नियम उल्लंघन गर्ने सवारीसाधनमाथिको कारबाहीबाट यो रकम उठेको हो ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय सुर्खेतका सूचना अधिकारी प्रहरी नायब उपरीक्षक हरिबहादुर बिसीका अनुसार गत असोज २६ गतेदेखि कात्तिक ६ गतेसम्मको अवधिमा कारबाहीमा परेका एक हजार ३३८ सवारीसाधनबाट १२ लाख २५ हजार रुपैयाँ राजस्व संकलन भएको हो ।
जिल्लागत विवरणअनुसार सबैभन्दा बढी सुर्खेतमा ६३८ सवारीसाधन कारबाहीमा परेका छन् । मादकपदार्थ सेवन गरी सवारी चलाएका चालकलाई कारबाही गर्दा सुर्खेतबाट मात्र पाँच लाख ८२ हजार रुपैयाँ उठेको छ । त्यस्तै सल्यानमा २२२ सवारीसाधनबाट दुई लाख १८ हजार ५००, रुकुमपश्चिममा १२७ सवारीसाधनबाट एक लाख ४५ हजार, दैलेखमा ९९ सवारीसाधनबाट ९४ हजार, जुम्लामा ६७ सवारीसाधनबाट ७३ हजार र जाजरकोटमा ६८ सवारीसाधनबाट ६१ हजार ५०० रुपैयाँ संकलन भएको छ । कालीकोटमा ८२ र डोल्पामा १८ सवारीसाधनबाट १७–१७ हजार, हुम्लामा १५ सवारीसाधनबाट १५ हजार र मुगुमा तीन सवारीसाधनबाट दुई हजार रुपैयाँ राजस्व उठेको छ ।
मादकपदार्थ सेवन गरी गाडी चलाउने २४६ जनालाई पनि कारबाही गरिएको छ । तीमध्ये सुर्खेतमा १५७, सल्यानमा ४६, दैलेखमा १७, रुकुमपश्चिममा नौ, जुम्लामा सात, कालीकोटमा पाँच, जाजरकोटमा चार र डोल्पामा एक जना रहेका छन् । चाडपर्वको समयमा सडक सुरक्षालाई प्राथमिकतामा राखेर ट्राफिक जाँचलाई तीव्र बनाइएको प्रहरीले जनाएको छ ।
