खोटाङका युवाले दसैँका चार दिनमा माइतीघर आवतजावत गर्ने ६४२ जना चेलीलाई निःशुल्क मोटरबाइक सेवा दिएका छन्। जिल्लामा सक्रिय युवा समूहले चलाएको ‘दसैँ, तिहार, चेलीलाई उपहार’ अभियानको तेस्रो संस्करणअन्तर्गत यो सेवा प्रदान गरिएको हो।
कात्तिक ३ गतेदेखि ६ गतेसम्म चलेको अभियानमा पहिलो दिन ५० जना, दोस्रो दिन ११० जना, तेस्रो दिन २५२ जना र अन्तिम दिन २३० जना चेलीले यो सुविधा लिएका हुन्। अभियानमा ५० जना राइडर सहभागी थिए। दिक्तेल रुपाकोट मझुवागढी नगरपालिका–१२ जालपाका वडाध्यक्ष दानबहादुर राई पनि राइडरका रूपमा खटिएका थिए।
अभियानका संयोजक सञ्जयकुमार राईका अनुसार माइती तथा मावली घर जाने क्रममा निःशुल्क यात्रा पाउँदा चेलीहरू खुसी भएका छन्। यो अभियान तिहारमा पनि जारी रहनेछ। तिहारमा माइती पुज्न जाने चेलीलाई कात्तिक २४ देखि २६ गतेसम्म निःशुल्क मोटरबाइक सेवा दिने तयारी छ।
दश स्थानीय तह रहेको खोटाङमा विभिन्न राजनीतिक दलमा आस्था राख्ने युवाले विसं २०८१ देखि यो अभियान चलाउँदै आएका छन्। दिक्तेलबजारको किरातचोकमा सचिवालय राखेर दिक्तेल बजारबाट ३५ किलोमिटर दूरीसम्म निःशुल्क सेवा दिने व्यवस्था मिलाइएको छ।
यातायातको साधन नपाएर अलपत्र परेका, आर्थिक अवस्था कमजोर भएका र भाडा तिरेर यात्रा गर्न नसक्ने महिला, बालबालिका र वृद्धालाई लक्षित गरी यो सेवा सुरु गरिएको हो। सवारीसाधनका लागि सहयोग जुटाएर इन्धनको प्रबन्ध मिलाइन्छ। विसं २०८१ मा ३४५ जना र विसं २०८२ मा ७५० जना चेलीलाई यस्तो सेवा दिइएको थियो।
सरकारको सेवा सुविधा पाउने, बहालवाला जनप्रतिनिधि र घरमा सवारीसाधन भएका चेलीले भने यो सुविधा पाउँदैनन्। सेवा लिनेले बढीमा पाँच केजीसम्मको झोला मात्र बोक्न पाउँछन्। जिल्लाका अधिकांश सडक कच्ची भएकाले दुर्घटनाको जोखिमलाई ध्यानमा राखेर तौलको सीमा तोकिएको हो। स्वयंसेवक बन्न चाहनेको सवारीसाधनको ब्लुबुक र चालक अनुमतिपत्र अनिवार्य छ। शुभेच्छुकको आर्थिक तथा प्राविधिक सहयोगमा चल्ने यो अभियानमा एकपटक करिब चार लाख रुपैयाँ खर्च हुने गरेको छ।
