काठमाडौं — नेपाल प्रिमियर लिग (एनपीएल) को तेस्रो संस्करण सुरु भएसँगै क्रिकेटप्रेमीले अब आफ्नै सहरमा बसेर खेलको प्रत्यक्ष अनुभव लिन पाउने भएका छन्। एक्सट्रीम इनर्जी ड्रिङ्कले देशका ९ सहरका १० ठाउँमा फ्यान जोन सञ्चालन गर्ने भएको छ, जहाँ ठूला एलईडी स्क्रिनमा खेल देखाइनेछ र प्रवेश शुल्क लाग्ने छैन।
एनपीएलका खेल कात्तिक ९ गतेदेखि मंसिर ५ गतेसम्म चल्नेछन्। यस अवधिमा काठमाडौं उपत्यकाभित्र तीनवटा फ्यान जोन रहनेछन्। काठमाडौंको सिफल मैदान, कीर्तिपुरको माइक्रो पार्क र त्रिभुवन विश्वविद्यालय क्रिकेट मैदानको दोस्रो नम्बर गेटअगाडिको मैदानमा दर्शकले ठूलो पर्दामा खेल हेर्न सक्नेछन्।
उपत्यकाबाहिर पनि फ्यान जोनको व्यवस्था गरिएको छ। धनगढीको कभर्ड हल क्षेत्र, सुर्खेतको घण्टाघर डबली, बुटवलको सिद्धेश्वरी ग्राउन्ड, पोखराको मालेपाटन चौर र चितवनको वीरेन्द्र बहुमुखी क्याम्पसस्थित डिग्री कलेज परिसरमा फ्यान जोन सञ्चालन हुनेछन्। त्यस्तै, जनकपुरको बाह्रबिघा चौर र विराटनगरको पुरानो गुद्री मैदानमा पनि दर्शक भेला भएर खेल हेर्न सक्नेछन्।
फ्यान जोनमा खेल हेर्नु मात्र नभई मनोरञ्जनका अरू कार्यक्रम पनि हुनेछन्। प्रत्यक्ष प्रसारणसँगै साङ्गीतिक प्रस्तुति, विभिन्न मनोरञ्जनात्मक गतिविधि र रमाइला खेलकुद कार्यक्रम आयोजना गरिनेछन्। गिभअवे कार्यक्रममार्फत दर्शकले आकर्षक उपहार जित्ने मौका पनि पाउनेछन्।
रंगशालामा पुगेर खेल हेर्न नसक्ने दर्शकका लागि यो पहल विशेष उपयोगी हुने अपेक्षा गरिएको छ। आफ्नै सहरको ठूलो पर्दामा मनपर्ने टोलीलाई समर्थन गर्दै खेल हेर्ने अवसरले एनपीएलको उत्साह देशका विभिन्न सहरमा फैलिने आयोजकको विश्वास छ।
