काठमाडौं । नेपाल प्रिमियर लिग (एनपीएल) को तेस्रो संस्करणमा खेल हेर्न पुग्ने दर्शकले रंगशालाभित्रै संगीतको माहोल पनि अनुभव गर्न पाउने भएका छन् । यसपटकको प्रतियोगितामा मनोरञ्जनको जिम्मेवारी काठमाडौंको चर्चित एलओडी क्लबले पाएको छ ।
आइतबार आयोजित एक कार्यक्रममा क्लब र क्रिकेट संघबीच यससम्बन्धी सम्झौता भएको हो । सम्झौतापत्रमा क्लबका प्रमुख कार्यकारी अधिकृत रविन श्रेष्ठ र क्रिकेट संघका सचिव पारस खड्काले हस्ताक्षर गरे । सोमबारदेखि कीर्तिपुरस्थित त्रिभुवन विश्वविद्यालय क्रिकेट मैदानमा सुरु हुने प्रतियोगिताभर क्लबका डिजेहरूले संगीत प्रस्तुत गर्नेछन् ।
खेल चलिरहँदा डिजेहरूले मैदानभित्र बनाइने एलओडी जोनबाट संगीत बजाउनेछन् । मैदानमा उपस्थित खेलाडी र दर्शक दुवैलाई खेलसँगै मनोरञ्जन दिलाउनु यस सहकार्यको उद्देश्य रहेको श्रेष्ठले बताए । पछिल्लो समय क्रिकेटप्रति युवापुस्ताको आकर्षण बढ्दै गएको र एनपीएलको लोकप्रियता पनि उकालो लागेको उनको भनाइ छ ।
खेलकुदलाई प्रतिस्पर्धामा मात्र सीमित नराखी उत्सव र संस्कृतिसँग जोड्न यस्तो सहकार्यले सहयोग पुग्ने आयोजकको विश्वास छ । यसअघि दोस्रो संस्करणमा पनि एलओडी क्लबले नै यही भूमिका निर्वाह गरेको थियो । सन् २०१९ मा स्थापना भएको यो क्लब छोटो अवधिमै नेपालको नाइटलाइफ क्षेत्रमा छुट्टै पहिचान बनाउन सफल भएको छ भने सन् २०२६ को सूचीमा विश्वका उत्कृष्ट क्लबमध्ये ४०औं स्थानमा पर्न सफल भएको छ ।
