काठमाडौं महानगरपालिकाले आयोजना गरेको दश किलोमिटर लामो हेरिटेज दौडमा महिला वर्गमा कृतिका ह्याउमिका र पुरुष वर्गमा सलमान शेखले शीर्ष स्थान हासिल गरेका छन्। आइतबार बिहान वसन्तपुरबाट सुरु भएको प्रतिस्पर्धामा कृतिकाले ५१ मिनेट ५८.५ सेकेन्डमा र सलमानले ३८ मिनेट ५६ सेकेन्डमा निर्धारित दूरी पूरा गरे।
महिला वर्गमा जेनिशा राई ५४ मिनेट २३ सेकेन्डसहित दोस्रो र निशा महर्जन ५८ मिनेट २५.८ सेकेन्डसहित तेस्रो भइन्। पुरुष वर्गमा समीर कन्दङ्वा ४० मिनेट २५.८ सेकेन्डमा दोस्रो तथा सुरज शाही ४४ मिनेट २२.८ सेकेन्डमा तेस्रो स्थानमा रहे। दुवै वर्गका पहिलो, दोस्रो र तेस्रो हुने धावकले क्रमशः ५० हजार, ३० हजार र २० हजार रुपैयाँ पुरस्कार पाए। कार्यवाहक प्रमुख सुनिता डंगोलले विजेतालाई पदक र प्रमाणपत्र हस्तान्तरण गरिन्।
बिहान ६ बजे वसन्तपुर डबलीबाट सुरु भएको दौड असन, जमल, दरबारमार्ग, नारायणहिटी, नक्साल, हाँडीगाउँ, मालीगाउँ, सिफल, गौशाला, मैतीदेवी, डिल्लीबजार, भद्रकाली, सहिद गेट, धरहरा र न्युरोड हुँदै पुनः वसन्तपुरमै टुंगिएको थियो। महानगरका १३ वटा वडा समेटिएको यस दौडमा सहभागिताका लागि ७०४ जनाले नाम लेखाएका थिए, जसमध्ये १५२ महिला र ५५२ पुरुष थिए। समयसीमाभित्र नाम दर्ता गराएका ५५० जनाले प्रतिस्पर्धा गरे।
महानगरले काठमाडौं म्याराथन आयोजना गर्ने एनएसआर स्पोर्ट्स फाउन्डेसनसँग मिलेर दौड आयोजना गरेको हो। सहरका सम्पदा र पैदल हिँड्ने संस्कृतिलाई उजागर गर्नु दौडको उद्देश्य रहेको आयोजकले जनाएको छ। ७५ वर्षीय मंगलदास तण्डुकार दौडका सबैभन्दा ज्येष्ठ सहभागी थिए भने पारालिम्पिक पदक विजेता क्याट्रिना वेब, धावक सन्तोषी श्रेष्ठ र ओलम्पियन हरिबहादुर रोकायाले पनि दौडमा साथ दिएका थिए।
