सर्बियामा लामो समयदेखि प्रभाव जमाएका नेता अलेक्जान्डर भुसिचले आकस्मिक संसदीय निर्वाचनमा पराजय स्वीकार गरेका छन्। विद्यार्थी नेतृत्वको आन्दोलनसँगको प्रतिस्पर्धामा प्रारम्भिक नतिजाले आफ्नो दल पछि परेको देखिएपछि उनले हार मानेको घोषणा गरे। आइतबार राति उनले अन्तिम नतिजा आइनसके पनि निर्वाचनमा हार निश्चित भएको बताए। यस घोषणापछि राजधानी बेलग्रेडलगायत विभिन्न सहरमा सर्वसाधारण सडकमा निस्किएर नाचगान र आतसबाजी गर्दै खुसी मनाए।
भुसिचको सर्बियन प्रोग्रेसिभ पार्टीले दुई वर्षदेखि चलिरहेको सरकारविरोधी आन्दोलनको दबाबबीच आकस्मिक निर्वाचन गराएको थियो। सन् २०२४ मा नोभी साद सहरको रेल्वे स्टेसनको छतको छज्जा खस्दा १६ जनाको मृत्यु भएपछि आन्दोलन सुरु भएको थियो। उक्त दुर्घटनालाई भ्रष्टाचार र सरकारी लापरबाहीको प्रतीकका रूपमा हेरिएको थियो।
निर्वाचनमा भ्रष्टाचारविरुद्ध अभियान चलाएको विद्यार्थी समूह ‘स्टुडेन्ट लिस्ट’ ले सरकारविरोधी मतदातालाई आकर्षित गर्यो। यस समूहले संसद्का २५० सिटका लागि चिकित्सक, कलाकार, प्राध्यापक र खेलकुद क्षेत्रका व्यक्तिसहित विभिन्न पृष्ठभूमिका उम्मेदवार उठाएको थियो। प्रारम्भिक विवरणअनुसार निर्वाचनमा अहिलेसम्मकै उच्च मतदान भयो; साँझ ६ बजेसम्म ६४.९ प्रतिशत मतदाताले मतदान गरिसकेको निर्वाचन आयोगले जनाएको छ।
विद्यार्थी समूहका प्रमुख उम्मेदवार इलिया स्र्दानोभिचले आन्दोलनको लक्ष्य देशलाई निरंकुश शासनबाट मुक्त गर्नु रहेको बताए। आन्दोलनले भ्रष्टाचारमा संलग्न अधिकारीमाथि कारबाही गर्ने, सार्वजनिक संस्थामा दलीय हस्तक्षेप अन्त्य गर्ने र सरकारी प्रसारणमाध्यमलाई राजनीतिक नियन्त्रणबाट मुक्त गर्ने प्रतिबद्धता जनाएको छ।
दुई कार्यकाल राष्ट्रपति भइसकेका भुसिच तेस्रो कार्यकालका लागि उम्मेदवार बन्न पाउँदैनथे, त्यसैले पार्टी जिताएर पुनः प्रधानमन्त्री बन्ने उनको प्रयास थियो। सन् २०१७ मा उनले प्रधानमन्त्री पद छाडेका थिए। भुसिचले भ्रष्टाचारका आरोप अस्वीकार गर्दै आएका छन्।
