काठमाडौँ । अमेरिकी कंग्रेसका सदस्यहरू सम्मिलित २१ जनाको टोलीले नेपालको भ्रमण गरेको छ । भुटानको बाटो हुँदै १६ जना र थाइल्याण्डको राजधानी बैंकक हुँदै पाँच जना गरी दुई समूहमा टोली नेपाल आएको हो ।
भुटान हुँदै आएको समूहको नेतृत्व अमेरिकी प्रतिनिधिसभाको वेज एण्ड मिन्स कमिटीका अध्यक्ष जेसन स्मिथले गरेका छन् । बैंकक हुँदै आएको पाँच सदस्यीय समूहको नेतृत्व सिनेटर टोड योङले गरेका छन् ।
भ्रमणका क्रममा टोलीले नेपालका उच्च अधिकारी र अमेरिकी दूतावासका कर्मचारीसँग भेटवार्ता गरेको छ । बैंकक हुँदै आएको समूह कात्तिक ६ गते थाई एयरलाइन्सको उडानबाट काठमाडौँ आइपुगेको थियो । भेटवार्तामा नेपाल र अमेरिकाबीच अन्तर्देशीय आपराधिक सञ्जाल नियन्त्रण गर्न सहकार्य गर्ने विषयलाई विशेष प्राथमिकता दिइएको थियो ।
इन्डियाना राज्यबाट रिपब्लिकन पार्टीको प्रतिनिधित्व गर्ने सिनेटर योङको भ्रमणले सीमापार हुने आपराधिक गतिविधि नियन्त्रण गर्ने, वैध व्यापारिक कारोबारको सुरक्षा गर्ने तथा दुवै देशको सुरक्षा र आर्थिक समृद्धि बलियो बनाउने प्रतिबद्धता देखाएको नेपालस्थित अमेरिकी दूतावासले जनाएको छ ।
दूतावासका अनुसार यस भ्रमणले नेपाल र अमेरिकाबीच सीमापार अपराध नियन्त्रण तथा आपराधिक सञ्जालविरुद्धको सहकार्यलाई अझ मजबुत बनाउने विषयमा छलफल भएको छ ।
भ्रमणकै क्रममा टोलीले चितवन राष्ट्रिय निकुञ्जको पनि अवलोकन गरेको छ । टोलीमा सांसदहरू जेसन थोमस स्मिथ, डेभिड शेरिडन स्वाइकर्ट, एलिस मारी स्टेफानिक, विलियम एन्ड्र्यु ओगल्स चौथो र लौरा सिरिल फ्रिडम्यानसहित कर्मचारी तथा पारिवारिक सदस्यहरू पनि सहभागी छन् ।
