रोल्पाका विपद् पीडित ५२ परिवारले आर्थिक राहत पाएका छन्। रोल्पा–काठमाडौं सम्पर्क समितिले जिल्ला सदरमुकाम लिबाङमा आयोजना गरेको कार्यक्रममा ती परिवारलाई नगद सहयोग वितरण गरिएको हो।
थबाङ, सुनछहरी र लुङ्ग्री गाउँपालिकाका पीडित परिवारलाई सहयोग दिइएको हो। बाढी, पहिरोलगायतका विपद्मा परेर प्रभावित भएका ती परिवारलाई प्रति परिवार ११ हजार ५ सय रुपैयाँका दरले रकम उपलब्ध गराइएको समितिले जनाएको छ।
विपद् पीडितलाई सहयोग जुटाउन समितिले आर्थिक संकलन अभियान सञ्चालन गरेको थियो। अभियानबाट उठेको रकम नै पीडित परिवारलाई वितरण गरिएको समितिका इन्चार्ज जेपी रोकामगरले बताए। उनले विपद्का कारण घरबार र जीविकोपार्जनमा क्षति व्यहोरेका परिवारलाई यो सानो सहयोगले केही राहत मिल्ने विश्वास व्यक्त गरे।
रोल्पामा बाढीपहिरोलगायतका विपद्बाट ५२ परिवार प्रभावित भएका छन्। पीडित परिवारको अवस्था बुझेर सहयोग जुटाउने काममा समिति लागिपरेको र आगामी दिनमा पनि यस्ता सहयोगका कार्यक्रमलाई निरन्तरता दिइने रोकामगरको भनाइ छ।
