नेपाल राष्ट्र बैंकको पछिल्लो प्रतिवेदनले कोशी प्रदेशको कृषि, रोजगारी र पर्यटन क्षेत्र झन् कमजोर बन्दै गएको देखाएको छ। राष्ट्र बैंकको विराटनगर कार्यालयले सार्वजनिक गरेको आर्थिक वर्ष २०८२/०८३ को प्रादेशिक आर्थिक गतिविधि अध्ययन प्रतिवेदनमा प्रदेशको समग्र आर्थिक वृद्धिदरमा केही सुधार देखिए पनि कृषि, उद्योग, रोजगारी र पर्यटनका सूचक भने ओरालो लागेको उल्लेख छ।
समीक्षा वर्षमा प्रदेशको आर्थिक वृद्धिदर ३.१३ प्रतिशत पुग्ने प्रारम्भिक अनुमान छ, जुन अघिल्लो वर्षको २.७२ प्रतिशतभन्दा माथि हो। तर राष्ट्रिय औसत ३.८५ प्रतिशतको तुलनामा यो अझै कमजोर छ। प्रचलित मूल्यमा प्रदेशको कुल गार्हस्थ्य उत्पादन १० खर्ब ४३ अर्ब ११ करोड रुपैयाँ पुगेको छ भने राष्ट्रिय अर्थतन्त्रमा प्रदेशको हिस्सा १५.८० प्रतिशत छ।
कृषितर्फ कुल उत्पादन १.२ प्रतिशतले खुम्चिएर ५५ लाख ९३ हजार मेट्रिक टनमा सीमित भएको छ। मुख्य बाली धानको उत्पादन ४.० प्रतिशतले घटेर १४ लाख ७ हजार मेट्रिक टनमा झरेको छ। खेतीयोग्य जमिनको केवल ३६.५ प्रतिशतमा मात्र सिँचाइ पुगेकाले कृषि अझै मौसममा निर्भर रहेको प्रतिवेदनले औंल्याएको छ। गहुँ, जौ, कफी र मह उत्पादनमा भने सुधार देखिएको छ।
पर्यटनमा पनि गिरावट आएको छ। प्रदेश भित्रिने बाह्य पर्यटक २१.८ प्रतिशतले घटेर ४७ हजार ४५७ मा सीमित भए भने होटलको औसत अकुपेन्सी ३२ प्रतिशतमा झरेको छ। उद्योगमा कार्यरत श्रमिकको संख्या २.१ प्रतिशतले घटेर १६ हजार ९ सय ६२ मा पुगेको छ। यद्यपि ऊर्जा क्षेत्रमा भने ७ वटा नयाँ जलविद्युत् आयोजना सम्पन्न भई २०६.२ मेगावाट विद्युत् राष्ट्रिय प्रसारणमा थपिएको छ।
