प्रहरी स्टाफ कलेजको संरचना र पाठ्यक्रममा सामान्य परिमार्जन गर्न अध्ययन समितिले सुझाव दिएको छ। प्रहरी प्रधान कार्यालयले भदौ १७ गते गठन गरेको समितिले केही दिनअघि प्रहरी महानिरीक्षक दान बहादुर कार्कीलाई प्रतिवेदन बुझाएको हो। प्रहरी नायब महानिरीक्षक विश्व अधिकारीको नेतृत्वमा बनेको समितिमा सात जना सदस्य थिए।
समितिले यस वर्ष २०७० सालमा इन्स्पेक्टरमा भर्ना भएका अधिकृतलाई मात्र स्टाफ कलेजको प्रवेश परीक्षामा सहभागी गराउन सिफारिस गरेको छ। ती अधिकृत १५८ औँ समूहका हुन् र उनीहरूले यसअघि दुई पटक प्रवेश परीक्षा दिइसकेका छन्। उनीहरूका लागि यस वर्षको परीक्षा अन्तिम अवसर हुनेछ।
प्रहरी प्रधान कार्यालयले २०८२ वैशाख २१ गते स्टाफ कलेजअन्तर्गत मास्टर इन पुलिस साइन्स र प्रोफेशनल लिडरसिप कोर्स सुरु गरेको थियो। पहिलो ब्याचमा १७ जना प्रहरी नायब उपरीक्षकले कोर्स पूरा गरे भने दोस्रो ब्याचमा १५ जना अधिकृत अध्ययनरत छन्। चार सेमेस्टरको यो कोर्स १६ महिनामा पूरा हुन्छ र महाराजगञ्जस्थित राष्ट्रिय प्रहरी प्रशिक्षण प्रतिष्ठानमा सञ्चालन भइरहेको छ।
समितिको सुझावपछि प्रतिष्ठानले प्रवेश परीक्षामा सहभागी हुने ६५ जना प्रहरी नायब उपरीक्षकको सूची सार्वजनिक गरेको छ। उनीहरूको प्रवेश परीक्षा पुसको पहिलो साता लिइने प्रहरी प्रवक्ता प्रहरी नायब महानिरीक्षक अबि नारायण काफ्लेले बताए। यसअघि मंसिर १८ गतेका लागि तय भएको परीक्षा विपद्का कारण रद्द भएको थियो।
पहिलो ब्याचको प्रवेश परीक्षामा १३१ जना र दोस्रोमा ८९ जनाले प्रतिस्पर्धा गरेका थिए। परीक्षामा चार विषयमा अनिवार्य रूपमा ५० अंकका दरले दुई सय अंक र सिम्याटमा ४० अंक ल्याउनुपर्ने व्यवस्था छ। हरेक वर्ष ३५ जनालाई कोर्स गराउने गरी कार्यक्रम स्वीकृत भए पनि पहिलो र दोस्रो ब्याचमा थोरै मात्र उत्तीर्ण भएपछि परिमार्जन आवश्यक देखिएको प्रवक्ता काफ्लेको भनाइ छ। स्टाफ कलेज नगरेको अधिकृत प्रहरी नायब महानिरीक्षकमा बढुवा हुन पाउँदैनन्।
