भरतपुर महानगरपालिका–२३ स्थित कसरा चोक नजिक आइतबार साँझ दुई मोटरसाइकल आपसमा ठोक्किँदा एउटामा आगो सल्किएको छ। साँझ करिब ६ बजे भएको उक्त दुर्घटनामा एक चालक गम्भीर घाइते भएका छन् भने अर्का चालकलाई सामान्य चोट लागेको छ।
प्रहरीका अनुसार जगतपुरबाट पटिहानीतर्फ गइरहेको मोटरसाइकल र विपरीत दिशाबाट आइरहेको अर्को मोटरसाइकल एकआपसमा जुधेका थिए। ठक्करपछि पहिलो मोटरसाइकलमा आगलागी हुँदा सवारी साधन पूर्ण रूपमा नष्ट भएको प्रहरीले बताएको छ।
आगलागीमा परेको मोटरसाइकलका चालक भरतपुर–१३ का ४६ वर्षीय सागर पौडेल गम्भीर घाइते भएका छन्। उनका दुवै हात, खुट्टा र छातीमा गरी शरीरको करिब ३६ प्रतिशत भाग जलेको प्रहरीले जनाएको छ।
घाइते पौडेललाई सुरुमा भरतपुरस्थित सरकारी अस्पतालमा सामान्य उपचार गरिएपछि थप उपचारका लागि कीर्तिपुरस्थित बर्न अस्पताल पठाइएको छ। दुर्घटनाका बेला उनले मादक पदार्थ सेवन गरेको प्रहरीको भनाइ छ।
अर्को मोटरसाइकलका चालक भरतपुर–२२ का १९ वर्षीय निसम बराल सामान्य घाइते भएका छन् र उनलाई स्थानीय मेडिकलमा उपचारका लागि पठाइएको छ। घटनाबारे थप अनुसन्धान भइरहेको प्रहरीले जनाएको छ।
