काठमाडौं । शिक्षा तथा खेलकुद मन्त्री सस्मित पोखरेलले नेपाल प्रिमियर लिग (एनपीएल) ले नेपाललाई विश्वसामु चिनाउने काममा ठूलो टेवा दिने धारणा व्यक्त गरेका छन् । प्रतियोगिताको तेस्रो संस्करणको उद्घाटन समारोहपछि प्रतिक्रिया दिँदै उनले एनपीएललाई देशको खेल पर्यटन विस्तार गर्ने बलियो आधारका रूपमा व्याख्या गरे ।
मन्त्री पोखरेलले एनपीएललाई ‘फेस्टिभल अफ हिमालयज’ का रूपमा चित्रण गर्दै यसले अन्तर्राष्ट्रिय मञ्चमा नेपालको पहिचान अझ मजबुत बनाउने विश्वास व्यक्त गरे । उद्घाटन समारोहमा दर्शकको ठूलो उपस्थिति र उत्साहले नेपाली खेलकुदको सम्भावना उजागर गरेको र त्यसले भविष्यप्रति आशा जगाएको उनको भनाइ थियो । दर्शकको समर्थनलाई उनले नेपाली खेल क्षेत्रको विकास र अन्तर्राष्ट्रिय पहिचानसँग जोड्ने अवसरका रूपमा लिएका थिए ।
प्रतियोगिताका लागि विदेशबाट आएका खेलाडी, कमेन्टेटर तथा अतिथिलाई स्वागत गर्दै मन्त्री पोखरेलले उनीहरूले क्रिकेटसँगै नेपालको संस्कृति, प्राकृतिक सुन्दरता र आतिथ्यको अनुभव लिएर फर्कने अपेक्षा व्यक्त गरे । उनले प्रतियोगितामा सहभागी सबै टोली तथा खेलाडीलाई रोमाञ्चक र उत्कृष्ट प्रदर्शनका लागि शुभकामना समेत दिएका छन् । खेलकुदका यस्ता ठूला प्रतियोगिताले देशको छवि बाहिर फैलाउनुका साथै पर्यटन क्षेत्रलाई समेत नयाँ ऊर्जा दिने उनको भनाइ छ ।
