कञ्चनपुरका किसानसम्म रासायनिक मल पुर्याउने कामले गति लिने भएको छ। कृषि सामग्री कम्पनी लिमिटेडको महेन्द्रनगर शाखाले जिल्लाका स्थानीय तहका लागि युरिया र डिएपी मलको हिस्सा निर्धारण गरेको छ। प्रदेश मल वितरण व्यवस्थापन समितिबाट शाखाले पाउने मलका आधारमा बाँडफाँट गरिएको हो।
यसपटक ५४१ मेट्रिक टन युरिया र ४८७ मेट्रिक टन डिएपी वितरण गरिनेछ। भीमदत्त र कृष्णपुर नगरपालिकाले समान १०३ मेट्रिक टन युरिया र ९३ मेट्रिक टन डिएपी पाउनेछन्। बेदकोट नगरपालिकाका लागि ९५ मेट्रिक टन युरिया र ८५ मेट्रिक टन डिएपी छुट्याइएको छ भने शुक्लाफाँटा नगरपालिकाले ९५ मेट्रिक टन युरिया र ८६ मेट्रिक टन डिएपी पाउनेछ। दोधारा चाँदनी नगरपालिकाका लागि ७९ मेट्रिक टन युरिया र ७१ मेट्रिक टन डिएपी तथा बेलडाँडी गाउँपालिकाका लागि ६४ मेट्रिक टन युरिया र ५७ मेट्रिक टन डिएपी तोकिएको छ।
मल वितरण सहकारीमार्फत हुनेछ। प्रत्येक पालिकाले आफ्नो क्षेत्रभित्रका सहकारीलाई कति मल उपलब्ध गराउने भन्ने सिफारिस शाखामा पठाउनुपर्नेछ। त्यही सिफारिसका आधारमा बुधबारदेखि सहकारीलाई मल वितरण गरिने शाखा प्रबन्धक हेमराज जोशीले जानकारी दिए।
मल बिक्री गर्ने सहकारीले किसानलाई वितरण गरेको विवरण एफएमएस प्रणालीमा अनिवार्य रूपमा अद्यावधिक गर्नुपर्नेछ। अनुदानको मल वितरण व्यवस्थापन कार्यविधिअनुसार विवरण र प्रतिवेदन तयार गरी सम्बन्धित स्थानीय तहबाट प्रमाणित गराएर महेन्द्रनगर शाखामा पेस गर्नुपर्नेछ। कम्पनीले तोकिएको मल १० दिनभित्र लैजान पनि अनुरोध गरेको छ।
