झापा जिल्लामा गत असोज महिनामा भएका विभिन्न विपद्का घटनाबाट १० करोड रुपैयाँभन्दा बढीको भौतिक क्षति भएको छ। जिल्ला प्रहरी कार्यालय झापाको तथ्याङ्कअनुसार असोजभर जिल्लामा २२ वटा विपद्का घटना भएका हुन्।
ती घटनामध्ये आगलागीले सबैभन्दा ठूलो नोक्सानी पुर्याएको छ। असोजमा जिल्लाका विभिन्न ठाउँमा १२ वटा आगलागी भएका थिए। ती आगलागीमा एक जना घाइते भए भने १० करोड ६६ लाख ८२ हजार ९७५ रुपैयाँ बराबरको सम्पत्ति जलेर नष्ट भयो।
जङ्गली जनावरको आक्रमणका नौ वटा घटना पनि सोही महिना भएका छन्। ती घटनाबाट तीन लाख ८९ हजार रुपैयाँ बराबरको क्षति भएको प्रहरीले जनाएको छ। जनावरको आक्रमण तथा जोखिममा परेका चार जनाको उद्धार गरिएको पनि प्रहरीको भनाइ छ।
यसैगरी चट्याङको एउटा घटनाबाट एक लाख रुपैयाँ बराबरको क्षति भएको छ। जिल्ला प्रहरी कार्यालय झापाका सूचना अधिकारी तथा प्रहरी नायब उपरीक्षक रञ्जन अवाले यी तथ्याङ्क सार्वजनिक गरेका हुन्।
विपद्का घटना बढिरहेका बेला प्रहरीले सर्वसाधारणलाई सतर्क रहन आग्रह गरेको छ। विद्युतीय उपकरण तथा आगोको प्रयोगमा सावधानी अपनाउन र वन तथा मध्यवर्ती क्षेत्र आसपासका बासिन्दालाई जङ्गली जनावरबाट जोगिन सतर्कता अपनाउन प्रहरीले अनुरोध गरेको छ।
