धादिङको कृषि विकास कार्यालयले धानबालीमा वर्षाले क्षति पुर्याउन सक्ने भन्दै किसानलाई काट्ने र भित्र्याउने समयमा विशेष ध्यान दिन आग्रह गरेको छ। कार्यालयले धानबाली काट्ने तथा भित्र्याउने सम्बन्धमा सूचना जारी गर्दै आगामी केही दिनको मौसम हेरेर मात्र निर्णय गर्न भनेको हो।
सूचनामा कात्तिक ११ देखि १५ गतेसम्म देशका विभिन्न ठाउँमा हल्कादेखि भारी वर्षा हुन सक्ने उल्लेख छ। यस्तो मौसममा काटिएको वा खेतमै रहेको धान भिजेर नोक्सान हुने भएकाले किसानले हतार नगरी मौसमको अवस्था बुझ्नु आवश्यक रहेको कार्यालयको भनाइ छ।
पाकिसकेको धानको हकमा कार्यालयले दुई विकल्प सुझाएको छ। मौसम बिग्रनुअघि भित्र्याउन सकिने धान तुरुन्तै भित्र्याउने र तत्काल भित्र्याउन नसकिने धान कात्तिक १५ गतेपछि मौसममा सुधार आएपछि मात्र काट्ने। यसरी समय मिलाउँदा वर्षाबाट हुने क्षति धेरै हदसम्म जोगिन सक्ने कार्यालयले जनाएको छ।
अझै नपाकेको धान भएका खेतमा भने पानी जम्न नदिन कुलो वा नाली काटेर निकासको व्यवस्था गर्न भनिएको छ। हावाहुरी वा पानीले धान ढलेको अवस्थामा बाला पानीमा डुब्न नदिन मुठो पारेर ठड्याउने वा अग्लो ठाउँमा राख्ने सुझाव पनि सूचनामा समेटिएको छ।
कार्यालयले किसानलाई मौसमको जानकारी निरन्तर लिइरहन र खेतको अवस्था हेरेर मात्र धान काट्ने निर्णय गर्न आग्रह गरेको छ।
