इसराइलमा आज आम निर्वाचन हुँदैछ, जसलाई प्रधानमन्त्री बेन्जामिन नेतन्याहूको राजनीतिक भविष्य निर्धारण गर्ने मतदानका रूपमा हेरिएको छ। स्थानीय समयअनुसार बिहान ७ बजेदेखि राति १० बजेसम्म मतदान हुनेछ।
मतदाताले १२० सदस्यीय संसद नेसेटका लागि प्रतिनिधि छान्नेछन्। सरकार बनाउन कुनै पनि पक्षलाई कम्तीमा ६१ सिट चाहिन्छ, तर निर्वाचनअघिका सर्वेक्षणले कुनै पनि गठबन्धनले स्पष्ट बहुमत ल्याउने संकेत गरेका छैनन्।
इसराइलमा सबैभन्दा लामो समय प्रधानमन्त्री रहेका नेतन्याहूले अहिलेसम्म १९ वर्ष सरकारको नेतृत्व गरिसकेका छन्। यसपटक उनको लिकुड पार्टी र दक्षिणपन्थी साझेदारहरूले पूर्वसेनाप्रमुख गादी आइजेनकोट नेतृत्वको विपक्षी गठबन्धनसँग प्रतिस्पर्धा गरिरहेका छन्। दुवै पक्षबीच निकै कडा टक्कर हुने अनुमान गरिएको छ।
सन् २०२३ को अक्टोबर ७ मा हमासले गरेको आक्रमणपछि देखिएको सुरक्षा कमजोरी, गजामा जारी सैन्य कारबाही, इरानसँगको टकराव र अन्तर्राष्ट्रिय मञ्चमा बढेको एक्लोपन यस निर्वाचनका प्रमुख मुद्दा बनेका छन्। उक्त आक्रमणमा १ हजार २ सय जनाको ज्यान गएको थियो भने २ सय ५१ जनालाई बन्धक बनाइएको थियो। गाजाका स्वास्थ्य अधिकारीहरूका अनुसार त्यसपछिको इसराइली कारबाहीमा ७४ हजार मानिस मारिएका छन्।
नेतन्याहूले आफ्नो अभियानमा युद्धकालीन नेतृत्व र अमेरिकी राष्ट्रपति डोनाल्ड ट्रम्पसँगको निकट सम्बन्धलाई जोड दिएका छन्। ट्रम्पले उनलाई खुलेर समर्थन गरेका छन्। आइजेनकोटले भने नेतन्याहूमाथि मतदातालाई डर देखाएर चुनाव जित्न खोजेको आरोप लगाएका छन्।
सरकार गठनका लागि नेतन्याहूले अतिदक्षिणपन्थी नेता इतामार बेन–गभिर र बेजालेल स्मोट्रिचको साथ खोज्नुपर्ने हुन सक्छ। उनीहरूमाथि प्यालेस्टिनीमाथि हिंसा भड्काएको आरोपमा केही पश्चिमा मुलुकले प्रतिबन्ध लगाएका छन्। नेतन्याहू भ्रष्टाचारसम्बन्धी मुद्दामा कानुनी लडाइँ पनि लडिरहेका छन्, जसलाई उनले अस्वीकार गर्दै आएका छन्।
अरब नागरिकको मतदान सहभागिताले पनि सरकार गठनको गणितमा असर पार्न सक्ने विश्लेषकहरूले बताएका छन्। राजनीतिक विश्लेषक अमोत्स आसाएलका अनुसार यसपटक कुनै पनि पक्षले ठूलो अन्तरले जित्ने सम्भावना छैन, र जसले जिते पनि बहुमत जुटाउन कठिन हुनेछ।
