काठमाडौँमा रहेको सर्वोच्च अदालतमा पुराना मुद्दाको थुप्रो अझै घट्न सकेको छैन। दुई वर्षदेखि १९ वर्षसम्म पुराना मुद्दा पेसीको पर्खाइमा छन्। सुनुवाइ लामो समयसम्म नहुने, हेर्न नभ्याइने र हेर्न नमिल्ने सूचीमा पर्ने कारणले ती मुद्दा अल्झिँदै आएका छन्।
अदालतका प्रवक्ता तथा सह-रजिस्ट्रार डा. अशोककुमार क्षेत्रीका अनुसार अहिले सर्वोच्चमा २६ हजार मुद्दा विचाराधीन छन्। सोमबारसम्म दुई वर्ष नाघेका मुद्दा ९ हजार ८ सय ५३ छन् भने पाँच वर्ष नाघेका १ हजार २ सय ४९ छन्। थुनुवाका १ हजार ६ सय मुद्दा र संवैधानिक इजलासका २ सय २८ मुद्दा पनि बाँकी छन्।
अदालतले पुराना मुद्दालाई प्राथमिकता दिन हप्तामा तीन दिन अभियान फाँटमार्फत सुनुवाइ गरिरहेको छ। पाँच वर्ष पूरा भएपछि मुद्दा स्वतः अभियानमा पर्ने, अभियानमा परेको मुद्दाको पेसी हटाउन नपाइने र एकदेखि तीन महिनाभित्र पेसी तोक्नुपर्ने नियम बनाइएको क्षेत्रीले बताए।
जिल्ला र उच्च अदालतमा मुद्दा फर्स्योट दर ६५ प्रतिशतभन्दा माथि भए पनि सर्वोच्चमा मुस्किलले ४० प्रतिशत पुग्ने गरेको वार्षिक प्रतिवेदनले देखाएको छ। पुराना मुद्दा छिटो टुंग्याउन २०७९ जेठ १० मा कार्यदल बनेको थियो र तत्कालीन न्यायाधीश तिलप्रसाद श्रेष्ठ संयोजक रहेको कार्यदलको प्रतिवेदन फुलकोर्टले अनुमोदन गरेको थियो।
सबैभन्दा पुरानो मुद्दा लाउडा विमान भाडासम्बन्धी भ्रष्टाचार मुद्दा हो, जुन १९ वर्षदेखि विचाराधीन छ। त्यस्तै छायादेवी सेन्टर विवादसम्बन्धी ११ वर्ष पुरानो मुद्दा पनि टुंगिएको छैन। द्वन्द्वकालकी मैना सुनुवारको हत्या मुद्दामा सुनुवाइ सकिएर मंसिर १० गते निर्णय सुनाउने पेसी तोकिएको छ।
