शिक्षा विकास तथा समन्वय इकाई, चितवनले शिक्षक तथा कर्मचारीलाई पदीय आचरणविपरीत सामाजिक सञ्जाल प्रयोग नगर्न निर्देशन दिएको छ। इकाईले जिल्लाका सबै विद्यालयलाई पत्राचार गर्दै प्रचलित कानुन र आचारसंहिताको पूर्ण पालना गर्न तथा सामाजिक सञ्जाल प्रयोग गर्दा जिम्मेवार बन्न आग्रह गरेको हो।
इकाई प्रमुख कृष्णचन्द्र पोखरेलले केही शिक्षक तथा कर्मचारीले पदीय आचरणविपरीत सामाजिक सञ्जाल प्रयोग गरेको भन्ने गुनासा आएपछि कानुनी व्यवस्थाबारे सचेत गराइएको बताए। ‘कानुन र नियमावलीमा भएका कुरा सम्झाएको मात्रै हो। यसको पालना सबैले गर्नुपर्छ,’ उनले भने।
इकाईले शिक्षा नियमावली, २०५९ को नियम १३३ को उपनियम (१) को खण्ड (घ) तथा सामाजिक सञ्जाल प्रयोग गर्ने सम्बन्धी निर्देशिका, २०८० को दफा ४ मा रहेका व्यवस्थाको स्मरण गराएको छ। निर्देशनमा नेपाल सरकार र नेपाली जनताबीचको सम्बन्धमा खलल पार्ने गरी बेनामी वा काल्पनिक नामबाट लेख प्रकाशन गर्ने, प्रेसलाई सूचना दिने, रेडियो वा टेलिभिजनमार्फत भाषण गर्ने तथा सार्वजनिक भाषण वा वक्तव्य दिने कार्यमा कानुनी बन्देज रहेको उल्लेख छ।
यस्तै, शिक्षा नियमावली, २०५९ को नियम १३३ को उपनियम (२) बमोजिम शिक्षक तथा कर्मचारीले आचारसंहिता पालना गरे–नगरेको विषयमा प्रभावकारी अनुगमन तथा नियमन गर्न पनि इकाईले सम्बन्धित विद्यालयलाई आग्रह गरेको छ। विद्यालयहरूले आफ्ना शिक्षक तथा कर्मचारीको सामाजिक सञ्जाल प्रयोगमाथि निगरानी राख्नुपर्ने र आचारसंहिताविपरीतका गतिविधि देखिएमा नियमन गर्नुपर्ने निर्देशनमा उल्लेख छ।
