बढुवा योग्यताक्रममा परेका करिब ६ हजार शिक्षकका उजुरीमाथिको पुनरावलोकनले फेरि गति लिएको छ। शिक्षक सेवा आयोगले उजुरी अध्ययन गरेर नतिजा प्रकाशन गर्ने काम तीव्र बनाएको हो।
आयोगका प्रवक्ता परशुराम तिवारीका अनुसार बढुवा सिफारिस समितिको सचिवालयको निर्णयअनुसार ७५ प्रतिशत कार्यसम्पादन मूल्याङ्कनका आधारमा हुने बढुवाको योग्यताक्रम सूची प्रकाशन भइरहेको छ। शिक्षक सेवा आयोग कार्य सञ्चालन कार्यविधि, २०७८ को परिच्छेद १५ मा भएको व्यवस्थाअनुसार आयोगले प्राप्त कागजात र प्रमाण हेरेर सम्बन्धित जिल्ला र तहका शिक्षकको बढुवा नतिजा कायम गर्ने प्रक्रिया अघि बढाएको छ।
प्रदेशका शिक्षा मन्त्रालयअन्तर्गतका शिक्षा विकास निर्देशनालयले गरेको कार्यसम्पादन मूल्याङ्कनविरुद्ध परेका उजुरीको अध्ययन र छानबिनपछि आयोगले पुनरावलोकन नतिजा सार्वजनिक गर्दै आएको थियो। तर आयोगका पदाधिकारी रिक्त भएपछि पछिल्लो छ महिनादेखि यो काम रोकिएको थियो।
यही कात्तिकमा माध्यमिक द्वितीय तहअन्तर्गत इलाम, सुनसरी, झापा र सोलुखुम्बुको पुनरावलोकन नतिजा प्रकाशन भएको छ। यसअघि गत असोज २९ गते प्राथमिक द्वितीय तहअन्तर्गत लमजुङ, बागलुङ, गोरखा, नवलपरासी (बर्दघाट सुस्ता पूर्व) र कास्कीको नतिजा सार्वजनिक गरिएको थियो।
सरकारले गत भदौ २५ गते डा. हरिप्रसाद लम्साललाई अध्यक्षसहित पदाधिकारी नियुक्त गरेको थियो। गत वैशाख १८ गते जारी सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ का कारण आयोगका पदाधिकारी रिक्त भएका थिए। नयाँ पदाधिकारी आएपछि रोकिएको पुनरावलोकन प्रक्रिया अघि बढेको हो।
