इजरायलमा २७ लाखभन्दा बढी मत गनिसक्दा प्रधानमन्त्री बेन्जामिन नेतन्याहूको लिकुद पार्टी सबैभन्दा ठूलो दल बनेको छ। तर कुनै पनि शिविरले सरकार बनाउन चाहिने ६१ सिटको बहुमत पाउने निश्चित भएको छैन। टाइम्स अफ इजरायललाई उद्धृत गर्दै प्रकाशित विवरणअनुसार लिकुदले वैध मतको २० दशमलव ८ प्रतिशत पाएको छ।
अनुमानअनुसार नेतन्याहू नेतृत्वको सत्तारूढ गठबन्धनले ५५ सिट पाउनेछ। उक्त गठबन्धनमा लिकुदसँगै शास, युनाइटेड टोराह जुडाइजम, ओत्ज्मा येहुदित र रिलिजियस जियोनिजम–जेहुत छन्। गाडी आइजेनकोट नेतृत्वको विपक्षी शिविरले ५० सिट पाउने अनुमान छ, जसमा याशर, नफ्ताली बेनेटको टुगेदर गठबन्धन, डेमोक्र्याट्स र यिसरायल बेइतेनु छन्। अरब दलहरू जोइन्ट लिस्ट र रामले संयुक्त रूपमा १५ सिट पाउने अनुमान गरिएको छ। याशर एक्लैले १७ दशमलव ०६ प्रतिशत मत पाएर दोस्रो स्थानमा छ भने बेनेटको टुगेदर ९ दशमलव २ प्रतिशतसहित तेस्रो स्थानमा छ।
बहुमत नपुगेपछि दुवै शिविरले साना दलसँग वार्ता गर्नुपर्ने देखिएको छ। पहिलो विकल्पमा कुनै एक पक्षले अर्को शिविरका साना यहुदी दललाई आफूतिर तानेर अरब दलको समर्थनबिना बहुमत पुर्याउन सक्छ। दोस्रो विकल्पमा आइजेनकोटले जोइन्ट लिस्ट र रामको समर्थनमा सरकार बनाउन सक्छन्, तर यो विकल्प विवादास्पद मानिन्छ। तेस्रो विकल्प अल्पमत सरकार हो, जसमा अरब दल सरकारमा नबसी बाहिरबाट समर्थन दिन सक्छन्। चौथो विकल्प नेतन्याहू र आइजेनकोटबीच पालैपालो प्रधानमन्त्री हुने राष्ट्रिय एकता सरकार हो, तर यस्तो सहमति निश्चित छैन। कुनै पनि विकल्प सफल नभए फेरि निर्वाचन हुन सक्छ।
रामका नेता मनसुर अब्बासले आइजेनकोटको शिविर र लिकुदसहित विभिन्न पक्षबाट फोन आएको बताएका छन्। नेतन्याहूले बुधबार बिहान अरब दललाई सरकारमा समावेश गर्न नहुने बताएका थिए। राष्ट्रपतिले सरकार बनाउन २८ दिन दिन सक्छन्, थप १४ दिन थप्न सक्छन्। नयाँ सरकारले संसदको विश्वासको मत पाउनुपर्छ।
