काठमाडौँ — कलाकार दीपकराज गिरीले सामाजिक सञ्जालमा आफूविरुद्ध चलाइएको बहिष्कार अभियानप्रति असन्तुष्टि व्यक्त गरेका छन्। बुधबार फेसबुकमा लेख्दै उनले आफ्नो साधारण भनाइलाई गलत रूपमा प्रस्तुत गरिएको बताएका छन्।
उनका अनुसार केही अतिवादी कार्यकर्ताले उनको भनाइका अंश काटेर र थप कुरा जोडेर गलत अर्थ लगाएका छन्। त्यसरी तयार पारिएका सामग्रीमा आफ्नो तस्बिर राखेर बहिष्कारको नारा लगाइएको र सामाजिक सञ्जालमा घृणा फैलाइएको उनको गुनासो छ। यस्तो देख्दा आफू अचम्मित भएको उनले उल्लेख गरेका छन्।
गिरीले आफूले सधैँ भौतिक आक्रमणको विरोध गर्दै आएको र बौद्धिक बहसको पक्षमा उभिएको बताएका छन्। कसैलाई लखेट्ने, पिट्ने वा भगाउने काम राम्रो नहुने र असहमति भए बौद्धिक रूपमा प्रतिवाद गर्नुपर्ने आफ्नो भनाइ रहेको उनले स्पष्ट पारेका छन्।
पछिल्लो समय समाजका धेरै विषयमा जातीयता जोडिने गरेको र वर्षौँदेखि कायम सहिष्णुता कमजोर पार्ने प्रयास भइरहेको भन्दै उनले चिन्ता व्यक्त गरेका छन्। कला र संस्कृतिको क्षेत्रमा पनि जातपातको कुरा ल्याएर घृणा फैलाउने प्रवृत्तिको आफू सधैँ विपक्षमा रहेको र आगामी दिनमा पनि रहने उनको भनाइ छ।
यो विवाद त्यतिबेला चुलिएको हो, जब गत सोमबार चलचित्र ‘छ माया छपक्कै २’ को नौ दिनको बक्स अफिस विवरण सार्वजनिक भयो। त्यसपछि सामाजिक सञ्जालमा विभिन्न भिडियो सार्वजनिक भएका छन्। बक्स अफिसमा अपेक्षाअनुसार नतिजा नआएको भन्दै गिरीका पुराना भनाइका अंश काटेर चलचित्र बहिष्कार गर्नुपर्ने आशयका भिडियोहरू फैलिरहेको बताइएको छ।
