बुटवलस्थित गौतमबुद्ध सामुदायिक मुटु अस्पतालमा कार्यरत २४० कर्मचारीले चाडपर्व खर्च पाएका छन्। श्रम तथा रोजगार कार्यालय बुटवलको निर्देशनपछि अस्पतालले एक महिनाको आधारभूत पारिश्रमिक बराबरको रकम भुक्तानी गरेको हो।
अस्पतालका श्रमिकले चाडपर्व खर्च नपाएको गुनासो युवा, श्रम तथा रोजगारमन्त्री रामजी यादवको सचिवालयमा पुगेको थियो। सोही गुनासोका आधारमा श्रम कार्यालयले ३० असोज २०८३ मा अस्पताललाई पत्र पठाएर भुक्तानी गर्न भनेको थियो। पत्रमा श्रम ऐन, २०७४ को दफा ३७ अनुसार हरेक श्रमिकले खाइपाइ आएको एक महिनाको आधारभूत पारिश्रमिक बराबर चाडपर्व खर्च पाउनुपर्ने व्यवस्था स्मरण गराइएको थियो। एक वर्ष सेवा अवधि पूरा नभएका श्रमिकको हकमा भने सेवा अवधिको अनुपातमा रकम दिनुपर्ने कानुनी व्यवस्था पनि पत्रमा उल्लेख थियो।
अस्पतालले ९ कात्तिकमा श्रम कार्यालयलाई जवाफ पठाउँदै २९ असोजदेखि नै २४० कर्मचारीलाई रकम भुक्तानी गरिसकेको जानकारी दिएको छ। सेवा सुविधासहित ४२ लाख ५४ हजार रुपैयाँ भुक्तानी गरिएको प्रमाणका रूपमा अस्पतालले बैंकिङ कारोबारको सूचीसमेत पेस गरेको मन्त्रालयले जनाएको छ।
गैरनाफामुखी संस्थाबाट सञ्चालित यो स्वास्थ्य संस्थाले आफ्ना सबै कर्मचारीको हक र सुविधाप्रति प्रतिबद्ध रहेको र समयमै भुक्तानी प्रक्रिया पूरा गरेको अस्पताल प्रशासनले जनाएको छ।
