नेकपा (एमाले)का अध्यक्ष केपी शर्मा ओलीले मुलुक अहिले आफ्नो स्वतन्त्रता र स्वाधीनता प्रयोग गर्न नसक्ने अवस्थामा पुगेको बताएका छन्। च्यासलस्थित पार्टीको केन्द्रीय कार्यालयमा मनोनीत तीन जना केन्द्रीय सदस्यलाई शपथ ग्रहण गराउँदै उनले अवस्था अझ बिग्रन नदिन आन्दोलनको तयारीबाहेक अर्को बाटो नभएको बताए।
देशले कम्तीमा स्वतन्त्रता र स्वाधीनताको अभ्यास गर्न सक्नुपर्ने धारणा राख्दै ओलीले अहिले स्वाधीनता खण्डित भएको आरोप लगाए। कसैले बोल्नै नसक्ने गरी राज्य आतङ्क सिर्जना गरिएको, गुण्डाराज चलिरहेको र सरकार नियन्त्रणबिना फासीवादतर्फ अघि बढिरहेको उनको भनाइ थियो।
समृद्ध नेपाल र सुखी नेपालीको आकाङ्क्षालाई गन्तव्य बनाएर आधुनिक नेपाल निर्माण गर्ने लक्ष्यसहित अघि बढिरहेको एमालेमाथि अहिलेको सङ्कटपूर्ण अवस्थाबाट देशलाई बाहिर निकाल्ने जिम्मेवारी आएको उनले बताए। सही नीति र विचारका आधारमा एकताबद्ध तथा अनुशासित भएर अघि बढेमा मात्र कार्यकर्तामा उत्साह आउने, जनतामा पार्टीप्रतिको आकर्षण फर्किने र उक्त जिम्मेवारी पूरा गर्न सकिने उनको तर्क थियो।
गत वर्ष फागुन २१ गते भएको निर्वाचनलाई उनले निर्वाचन नभई प्रतिगमनको योजनाबद्ध दोस्रो शृङ्खला भने। एमाले सत्य, न्याय, देश र जनताको पक्षमा रहेकाले आगामी स्थानीय तहको निर्वाचनमा विजय हासिल गर्ने विश्वास उनले व्यक्त गरे।
