नेकपा एमालेका अध्यक्ष केपी शर्मा ओलीले स्वाधीनता र लोकतन्त्र जोगाउन आन्दोलनबाहेक अर्को बाटो नभएको बताएका छन्। उनले नेता तथा कार्यकर्तालाई मानसिक रूपमा तयार रहन आग्रह गरेका छन्।
बुधबार काठमाडौंको च्यासलस्थित पार्टी कार्यालयमा मनोनित केन्द्रीय कमिटी सदस्य मोहम्मद इस्तियाक राई, डा. पुष्पा के.सी. भण्डारी र इन्दु कडरिया विष्टलाई शपथ गराउँदै ओलीले यस्तो धारणा राखेका हुन्। पार्टी बलियो बनाउन, एकताबद्ध राख्न र प्रतिगमनलाई पराजित गर्न आन्दोलनको तयारी गर्नुपर्ने उनको भनाइ थियो।
कठिन राजनीतिक अवस्थामा पनि सत्य, न्याय र देशको पक्षमा उभिएर अनुशासित रूपमा अघि बढ्नुपर्ने आवश्यकता रहेको उनले बताए। देशमा आतङ्क फैलाउने काम भइरहेको आरोप लगाउँदै उनले सादा पोसाकका प्रहरी प्रयोग गरेर बलजप्ती र पक्राउ गर्ने प्रवृत्तिप्रति आपत्ति जनाए। यस्ता कामलाई उनले अराजक भनेका छन्।
देशी–विदेशी तथा आन्तरिक–बाह्य शक्तिहरू एकजुट भएर सिद्ध्याउन खोज्दा पनि एमाले बलियो हैसियत र लोकप्रिय मतसहित उभिएको ओलीको दाबी थियो। अघिल्लो चुनाव पारदर्शी नभएको र प्रतिगमनको दोस्रो शृङ्खला भएको टिप्पणी गर्दै उनले एकता र अनुशासनसहित अघि बढेर आगामी दिनमा जित हासिल गर्नुपर्नेमा जोड दिए।
पार्टीभित्र देखिने विकृति, अराजकता र अनुशासनहीनता सह्य नहुने भन्दै उनले त्यसलाई अन्त्य गर्नुपर्ने बताए। आफ्नै पार्टी, नेतृत्व वा नीतिविरुद्ध बाहिर सार्वजनिक रूपमा बोल्नु संस्थागत नियमविपरीत हुने भएकाले सचेत रहन पनि उनले आग्रह गरे।
