जिल्ला अदालत ललितपुरले अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राईलाई धरौटीमा छाड्न आदेश दिएको छ। जिल्ला न्यायाधीश हरिसिंह धामीको एकल इजलासले बुधबार उनीहरूलाई जनही पाँच लाख रुपैयाँ धरौटीमा छाड्न आदेश दिएको हो।
सरकारी वकिल कार्यालयले प्रतिवादीहरूबाट कुल ९३ लाख ९ सय रुपैयाँ बिगो र क्षतिपूर्ति भराउन माग गरेको थियो। जिल्ला सरकारी वकिल कार्यालय ललितपुरले गत असोज २२ मा जिल्ला अदालत ललितपुरमा दायर गरेको अभियोगपत्रमा अध्यक्ष नेम्वाङ, महासचिव राई, कोषाध्यक्ष रविन्द्र जोशी र लेखा अधिकृत सन्जीव पाण्डेलाई प्रतिवादी बनाइएको थियो। उनीहरू दुवै बुधबार बयानका लागि अदालतमा हाजिर भएका थिए।
नेपाल प्रहरीको केन्द्रीय अनुसन्धान ब्युरो (सीआईबी) ले अनुसन्धानपछि चारै जनाविरुद्ध मुद्दा दर्ता गरेको थियो। उनीहरूमाथि राष्ट्रिय खेलकुद विकास ऐन, २०७७ अन्तर्गत खेलमा मिलोमतो तथा अनियमितता गर्न नहुने कसुर र मुलुकी अपराध संहिता, २०७४ अन्तर्गत ठगीसम्बन्धी कसुरको आरोप छ। कोषाध्यक्ष जोशी र लेखा अधिकृत पाण्डे भने यसअघि नै क्रमशः १५ लाख र १२ लाख धरौटीमा रिहा भइसकेका छन्। अध्यक्ष र महासचिव मुद्दा दायर भएपछि फरार रहँदै आएका थिए।
अभियोगमा फिफा विश्वकप २०२६ छनोटअन्तर्गत सन् २०२४ मार्च २१ मा दशरथ रंगशालामा हुनुपर्ने नेपालको घरेलु खेल बहराइनमा सारिएको, टिकट बिक्रीबापत बहराइनले दिनुपर्ने २० हजार अमेरिकी डलर एन्फाको आधिकारिक बैंक खातामा नजम्मा गरिएको र एएफसीको एक्स्ट्रा टाइम प्रोजेक्टअन्तर्गत खेलकुद सामग्री खरिदमा अनियमितता भएको दाबी गरिएको छ।
