काठमाडौं — राष्ट्रिय स्वतन्त्र पार्टीका सांसद जगदीश खरेलले छिमेकी मुलुकलाई गाली गरेर मात्रै नेपाली राष्ट्रियता बलियो नहुने बताएका छन्। दोलखाका सांसद खरेलले बुधबार रिपोर्टर्स क्लब नेपालमा आयोजित साक्षात्कार कार्यक्रममा बोल्दै अर्थमन्त्री स्वर्णिम वाग्लेको बचाउ गरेका हुन्। उनले वाग्लेले भारतमा गएर सद्भाव र मित्रभाव मात्र प्रकट गरेको स्पष्ट पारे।
खरेलका अनुसार छिमेकीसँग मिलेर अघि बढ्ने आशयका साथ उक्त अभिव्यक्ति आएको थियो। छिमेकी मुलुकप्रति नकारात्मक अभिव्यक्ति दिँदैमा देशको राष्ट्रिय भावना बलियो हुँदैन भन्ने उनको तर्क थियो। उनले छिमेकीसँगको सम्बन्धलाई सकारात्मक रूपमा अघि बढाउनुपर्ने धारणा राखे।
भारतसँग देखिएका सीमा विवाद तथा अन्य समस्याहरूलाई कूटनीतिक पहल र संवादका माध्यमबाट समाधान गर्नुपर्नेमा उनले जोड दिए। समस्याको समाधान संवाद र कूटनीतिबाटै खोजिनुपर्ने उनको भनाइ थियो। छिमेकीसँग मिलेर अघि बढ्ने बाटो नै उपयुक्त हुने उनले बताए।
सांसद खरेलले राष्ट्रिय स्वतन्त्र पार्टी जिम्मेवार भएर अघि बढ्न तयार रहेको पनि बताए। विपक्षी दलहरूलाई गाली गर्ने राजनीतिमा आफूहरू नलाग्ने उनको भनाइ थियो। जिम्मेवार राजनीतिक अभ्यासबाटै दलले आफ्नो भूमिका निर्वाह गर्ने उनले स्पष्ट पारे।
