दुई निर्वाचनबीच कांग्रेसको समानुपातिक मतमा देखिएको ठूलो गिरावटले पार्टीलाई मतदातासँगको सम्बन्धबारे नयाँ ढंगले सोच्न बाध्य बनाएको छ। २०७९ को प्रतिनिधिसभा निर्वाचनमा कांग्रेसलाई समानुपातिकतर्फ २७ लाख १५ हजार २२५ मत प्राप्त भएको थियो। गत फागुनमा भएको निर्वाचनमा भने त्यो संख्या १७ लाख ५९ हजार १७२ मा झर्यो। अर्थात्, पार्टीले ९ लाख ५६ हजार ५३ मत गुमायो।
यही पृष्ठभूमिमा कांग्रेसले मंसिरभर देशव्यापी जागरण अभियान सञ्चालन गर्ने तयारी गरेको छ। सभापति गगनकुमार थापाले ९ कात्तिकमा स्याङ्जा पुगेर अभियानको सोचबारे जानकारी गराएका थिए। उनका अनुसार पहिले कांग्रेससँग जोडिएका परिवार किन टाढिए, उनीहरूका गुनासा के हुन् र सम्बन्ध किन बिग्रियो भन्ने बुझ्नु अभियानको केन्द्रमा रहनेछ। महाधिवेशनबाट पार्टीमा आएको परिवर्तनको सन्देश घरघरसम्म पुर्याउने लक्ष्य पनि राखिएको छ।
महामन्त्री प्रदीप पौडेलले अभियानको भित्री उद्देश्य मत गुम्नुको कारण खोज्नु रहेको बताए। उनका अनुसार अपेक्षा गरिएका १० लाख मत नआउनुको कारण पत्ता लगाएर ती मतदातासम्म पुग्ने र उनीहरूको मनस्थिति बुझ्ने काम हुनेछ। अभियानमा केन्द्रदेखि वडासम्मका संरचना परिचालन गरिनेछ भने समन्वयका लागि केन्द्रीय कार्यसमितिबाट प्रतिनिधि खटाइनेछन्। जिल्ला र प्रदेश अधिवेशन पनि यही अभियानभित्र मंसिरभित्रै सम्पन्न गर्ने योजना छ।
पौडेलका अनुसार अभियानबाट आगामी स्थानीय तह निर्वाचनमा मत बढाउने अपेक्षा गरिएको छ। मंसिरमा संगठन र जनविश्वासमा केन्द्रित भएपछि पुस र माघमा निर्वाचनलक्षित गतिविधि अघि बढाइनेछ। यसैबीच, १५औँ महाधिवेशनबाट निर्वाचित पदाधिकारी र सदस्यको शपथग्रहण बिहीबार दिउँसो २ बजे केन्द्रीय कार्यालयमा हुने निर्वाचन समितिका सदस्यसचिव राजु कटुवालले जानकारी दिएका छन्।
