सडक सुरक्षालाई बलियो बनाउने काममा स्थानीय तहको भूमिका निर्णायक हुने धारणा पूर्वाधार विकास समितिका सभापति आशिष गजुरेलले राखेका छन्। काठमाडौं मेडिकल कलेजले आयोजना गरेको सडक सुरक्षा पुस्तिका विमोचन तथा सामुदायिक संलग्नतासम्बन्धी अनुभव आदानप्रदान कार्यक्रममा उनले स्थानीय सरकार र समुदायको सक्रिय सहभागिताबिना सडक सुरक्षा प्रभावकारी हुन नसक्ने बताए।
कार्यक्रममा सडक दुर्घटना घटाउने उपाय, सुरक्षित यातायात प्रणाली र स्थानीय तहको जिम्मेवारीबारे छलफल भएको थियो। बागमती प्रदेशका कालिका, गल्छी, बकैया, बेलकोटगढी, भीमफेदी, पनौती र रत्ननगरलगायत आठ पालिकाका प्रमुखहरू सहभागी थिए। सहभागी जनप्रतिनिधिले आफ्ना पालिकामा देखिएका अनुभव, चुनौती र सम्भावित समाधान प्रस्तुत गरेका थिए।
गजुरेलले सडक सुरक्षा आफ्नो प्राथमिक विषय रहेको बताउँदै सुरक्षित सडक र भरपर्दो यातायात प्रणालीका लागि आफूले लामो समयदेखि आवाज उठाउँदै आएको उल्लेख गरे। दुर्घटनाबाट हुने मानवीय क्षति घटाउन सडक पूर्वाधारको गुणस्तर सुधार, प्रभावकारी ट्राफिक व्यवस्थापन, सवारीसाधनको सुरक्षित सञ्चालन, चालकको जिम्मेवार व्यवहार र नागरिकमा सचेतना बढाउनुपर्ने उनको जोड थियो। सडक सुरक्षा सडक निर्माणमा मात्र सीमित नभई नागरिकको जीवनरक्षा र सार्वजनिक सुरक्षासँग जोडिएको विषय भएको उनले बताए।
उनले १६ असोजमा प्रतिनिधिसभामा राष्ट्रिय सडक सुरक्षा विधेयक दर्ता भएको जानकारी गराउँदै त्यसलाई अझ प्रभावकारी बनाउन विज्ञ, स्थानीय तह, सरोकारवाला र नागरिकबाट सुझाव मागे। नीति तथा कार्यक्रमको कार्यान्वयन, स्थानीय तहको जिम्मेवारी, समुदायको सहभागिता र निकायबीचको समन्वयबारे पनि छलफल भएको कार्यक्रम राज्यका निकाय, स्थानीय सरकार, स्वास्थ्य संस्था, सुरक्षा निकाय, यातायात क्षेत्र र नागरिकबीच सहकार्य आवश्यक रहेको निष्कर्षसहित सम्पन्न भएको थियो।
