सेयर बजारका १२ समूहगत सूचकमध्ये बैंकिङ समूहले पछिल्ला दुई महिनामा सबैभन्दा बलियो प्रदर्शन गरेको छ। १९ वाणिज्य बैंकको प्रतिनिधित्व गर्ने बैंकिङ सूचक १ हजार ५८२ अंकमा पुगेको छ, जुन दुई वर्षयताकै उच्च हो। २०८० कात्तिक ४ मा सूचक १ हजार ५९० अंकमा पुगेको थियो, त्यसयताको उच्चतम बिन्दु बुधबार कायम भएको हो।
भदौ १० मा १ हजार ४२६ अंकमा रहेको सूचक दुई महिनामै १०.९३ प्रतिशत बढेको छ। सोही अवधिमा नेप्से परिसूचक भने ४.१४ प्रतिशत मात्र बढेको छ। यस अवधिमा लक्ष्मी सनराइजको सेयर मूल्य २५.८६ प्रतिशत, एनएमबीको १५.३६ प्रतिशत र प्राइम कमर्सियलको १५.१३ प्रतिशत बढेको छ। कृषि विकास बैंकको मूल्य पनि १४.४९ प्रतिशतले उक्लिएको छ।
लाभांश घोषणा गरिसकेका बैंकका लगानीकर्ताले लाभांशसमेत पाइसकेका छन्। सिद्धार्थले २० प्रतिशत, एभरेस्टले १५ प्रतिशत, नबिलले १५.८ प्रतिशत र ग्लोबल आईएमईले १० प्रतिशत लाभांश दिएका छन्। सानिमाले १० प्रतिशत नगद लाभांश दिएको छ। यी लाभांश मूल्यमा समायोजन भइसकेका छन्, त्यसबाहेकको मूल्यवृद्धिबाट पनि लगानीकर्ताले लाभ पाएका छन्।
नेपाल इन्भेस्टर्स फोरमका अध्यक्ष तुलसीराम ढकालका अनुसार वाणिज्य बैंकको मूल्य–आम्दानी अनुपात सबैभन्दा कम भएकाले बैंकको सेयर आकर्षक देखिएको छ। स्थिर लाभांश दिने बलिया कम्पनी संस्थागत लगानीकर्ताको रोजाइमा पर्ने उनको भनाइ छ। यद्यपि निष्क्रिय कर्जा र गैरबैंकिङ सम्पत्ति अझै उच्च रहेकाले वितरणयोग्य नाफामा दबाब छ। माछापुच्छ्रे बैंकका डीसीईओ प्रसिद्धराज अर्यालका अनुसार ब्याजदर अन्तर साँघुरिँदा आम्दानी घट्नु र खराब कर्जाका लागि धेरै रकम छुट्याउनुपर्नु लाभांश कम हुनुका कारण हुन्। तर असुली बढेमा त्यो रकम पछि नाफा र लाभांशमा फर्किने उनले बताए।
