भारतको इलाहाबाद उच्च अदालतमा न्यायाधीश र कानुन व्यवसायीबीचको मतभेद इजलासभित्रै चर्किएको छ। विवाद बढ्दै जाँदा कानुन व्यवसायीहरूले इजलासमै प्रदर्शन गरे र डायसतर्फ फर्निचर फ्याँकेको बताइएको छ। अदालतभित्रै भएको यो घटनाले न्यायिक कामकाजको वातावरणबारे गम्भीर प्रश्न उठाएको छ।
इलाहाबाद उच्च अदालत बार एसोसिएसनका अनुसार घटनाको सुरुआत मंगलबार भएको थियो। त्यस दिन न्यायाधीश अजय भानोतको इजलासमा कानुन व्यवसायीका लागि छुट्याइएको सिटमा एक प्रहरी उपरीक्षक बसेका थिए। न्यायाधीश भानोतको इजलासमा प्रहरी तथा अन्य उच्चपदस्थ अधिकारीका लागि छुट्टै कुर्सी राख्ने चलन रहेको भन्दै एक अधिवक्ताले ती प्रहरी अधिकारीलाई पछाडिको सिटमा जान आग्रह गरेका थिए।
बार एसोसिएसनको दाबीअनुसार त्यसपछि न्यायाधीश भानोतले प्रहरी अधिकारीसँग असहमति जनाएको भन्दै ती अधिवक्तालाई उल्टै माफी माग्न लगाए। न्यायाधीशले ती अधिवक्तालाई जेल हाल्ने धम्की दिएको र अर्का एक वरिष्ठ अधिवक्ताको उपहास गरेको आरोप पनि बारले लगाएको छ। अधिवक्तामाथि भएको व्यवहारलाई लिएर बार एसोसिएसनले मुख्य न्यायाधीशको ध्यानाकर्षण गराएको थियो।
कारबाही नभए न्यायाधीश भानोतको इजलास बहिष्कार गर्ने चेतावनी दिएको भोलिपल्ट बुधबार कानुन व्यवसायीहरूले इजलासभित्रै विरोध प्रदर्शन गरे। बार एसोसिएसनले न्यायाधीशको व्यवहारमाथि छानबिन र कारबाहीको माग गरेको छ।
