नक्कली कागजात तयार गरेर सरकारी रकम हिनामिना गरेको आरोपमा अख्तियार दुरुपयोग अनुसन्धान आयोगले तीनजनाविरुद्ध विशेष अदालतमा भ्रष्टाचार मुद्दा दायर गरेको छ। आयोगले बुधबार काठमाडौँस्थित विशेष अदालतमा आरोपपत्र बुझाएको हो।
आरोपपत्रमा मुगुको खानेपानी, सिँचाइ तथा ऊर्जा विकास कार्यालयका तत्कालीन प्रमुख राजीव रिमाल, तत्कालीन लेखापाल रून बहादुर सेजुवाल र परामर्शदाता कम्पनी एलाइड इन्जिनियरिङ्ग प्रा.लि.का प्रबन्ध निर्देशक चन्द्र बहादुर बुढालाई प्रतिवादी बनाइएको छ। उनीहरूले मुगुका १३ वटा खानेपानी योजनाको विस्तृत परियोजना प्रतिवेदन (डीपीआर) बनाउने नाममा ३९ लाख ४० हजार ३०९ रुपैयाँ हिनामिना गरेको आरोप छ।
अख्तियारको अनुसन्धानमा योजनाहरूलाई सार्वजनिक खरिद कानुनविपरीत दुई समूहमा विभाजन गरिएको देखिएको छ। पहिलो समूहमा नौ र दोस्रो समूहमा चार योजना राखिएका थिए। मूल्याङ्कन समिति नै नक्कली बनाइएको, समितिका निर्णय र हस्ताक्षरसमेत फर्जी गरिएको र प्रतिवेदन नै नबनाई झुट्टा बिलका आधारमा परामर्शदातालाई भुक्तानी दिइएको आयोगको भनाइ छ। यसबाट प्रदेश र सङ्घीय सरकारलाई नोक्सानी पुगेको आयोगका प्रवक्ता सुरेश न्यौपानेले जारी गरेको विज्ञप्तिमा उल्लेख छ।
रिमाल र सेजुवालविरुद्ध भ्रष्टाचार निवारण ऐन, २०५९ को दफा १७ र दफा ३ बमोजिम बिगो असुल, सोही बराबर जरिवाना र कैद सजायको माग गरिएको छ। गैरकानुनी लाभ लिने मतियारका रूपमा बुढाविरुद्ध पनि मुख्य कसुरदारसरह कैद, जरिवाना र बिगो असुलको मागदाबी गरिएको छ।
