इजरायलमा आज नयाँ संसदका लागि आम निर्वाचन भइरहेको छ। सन् २०२३ अक्टोबर ७ मा हमासले गरेको आक्रमण र त्यसपछिको क्षेत्रीय युद्धपछिको यो पहिलो आम निर्वाचन हो। यस निर्वाचनमा करिब ७३ लाख मतदाताले मतदान गर्दैछन्।
यो निर्वाचनलाई प्रधानमन्त्री बेन्जामिन नेतान्याहूको राजनीतिक भविष्यका लागि अहिलेसम्मकै ठूलो परीक्षणका रूपमा हेरिएको छ। इजरायलमा सबैभन्दा लामो समय प्रधानमन्त्री बनेका नेतान्याहूले १९ वर्ष सरकारको नेतृत्व गरिसकेका छन्।
यसपटक उनको लिकुड पार्टी र दक्षिणपन्थी सहयोगीहरूको गठबन्धनले पूर्वसेनाप्रमुख गादी आइजेनकोट नेतृत्वको प्रतिस्पर्धी गठबन्धनसँग कडा प्रतिस्पर्धा गर्नुपर्ने देखिएको छ। नेतान्याहूले युद्धकालीन नेतृत्व र अमेरिकी राष्ट्रपति डोनाल्ड ट्रम्पसँगको सम्बन्धलाई आफ्नो मुख्य उपलब्धिका रूपमा प्रस्तुत गरेका छन्।
१२० सदस्यीय संसदमा सरकार बनाउन कम्तीमा ६१ सिट चाहिन्छ। निर्वाचनअघिका सर्वेक्षणले कुनै पनि पक्षलाई स्पष्ट बहुमत कठिन हुने देखाएका छन्, त्यसैले मतदानपछि गठबन्धन बनाउन कडा रस्साकस्सी हुने अनुमान छ।
मतदान सकिएलगत्तै एक्जिट पोल सार्वजनिक हुनेछन्। प्रारम्भिक र आधिकारिक परिणाम आगामी केही दिनमा आउने क्रम जारी रहनेछ भने पूर्ण तथा अन्तिम नतिजा नोभेम्बरको पहिलो साताभित्र आउने अपेक्षा गरिएको छ। यो परिणामले इजरायलको आन्तरिक राजनीति र मध्यपूर्वको भूराजनीतिमा गहिरो प्रभाव पार्ने देखिन्छ।
