दसैँ सकिएसँगै पोखरा वरपरका गाउँमा पर्यटकको आगमन बढेको छ। पर्यटकीय सिजन सुरु भएपछि आन्तरिक र विदेशी पाहुना ग्रामीण बस्तीका होमस्टेतर्फ जान थालेका छन्। सहरको भीडभाडबाट टाढा प्रकृतिमा समय बिताउन चाहनेहरूका लागि गाउँका होमस्टे रोजाइ बन्न थालेका छन्।
किफायती प्याकेज, स्थानीय खानपान, मौलिक संस्कृति र हिमालको दृश्यले पाहुनालाई गाउँतर्फ तानिरहेको छ। पोखरा महानगर आसपासका डाँडाकाँडामा रहेका होमस्टेमा स्वदेशी तथा विदेशी पाहुनाको उपस्थिति बढ्दै गएको छ।
कास्कीको माछापुच्छ्रे गाउँपालिका–६ को हेम्जाकोटमा पनि अहिले पाहुनाको चहलपहल बढेको छ। हिमशृङ्खलाको दृश्य, शान्त वातावरण र गाउँको जीवनशैलीले त्यहाँ पुग्ने पर्यटकलाई आकर्षित गरिरहेको छ। पोखरा घुम्न आउनेहरू पनि नजिकका गाउँमा पुगेर केही समय बिताउन रुचाउन थालेका छन्।
ग्रामीण पर्यटन प्रवर्द्धन मञ्चका सचिव भीमराज पौडेलले पोखरा आउने पर्यटकलाई वरपरका गाउँसम्म पुर्याउन सके ग्रामीण पर्यटनले थप गति लिने बताए। उनका अनुसार प्राकृतिक सौन्दर्य र स्थानीय आतिथ्यताले गाउँका होमस्टेलाई आकर्षणको केन्द्र बनाएको छ। अहिले पाहुनाको आगमन राम्रो रहेको र हप्तामा दुई दिन बिदा हुने भएकाले शुक्रबार र शनिबार धेरै पर्यटक आउने गरेको उनले बताए।
होमस्टे सञ्चालक उमा गुरुङले अघिल्लो वर्षको तुलनामा यस वर्ष पाहुनाको उपस्थिति उल्लेख्य बढेको बताइन्। पर्यटक बढ्दा स्थानीयस्तरमै आम्दानीका अवसर सिर्जना भएको उनको भनाइ छ। कोरोना महामारीपछि ठप्प भएको होमस्टे व्यवसाय अहिले पुनः तङ्ग्रिएको उनले बताइन्।
पर्यटन बोर्डका सदस्य सन्तोष पोखरेलले गाउँमा पर्यटकको बसाइलाई सहज बनाउन तालिम र प्रवर्द्धनात्मक कार्यक्रम सञ्चालन हुँदै आएको बताए। उनका अनुसार प्रकृतिसँग रमाउन चाहने पाहुनाका लागि पोखराका होमस्टे उपयुक्त माध्यम बनेका छन् भने रैथाने खानेकुराले पनि गाउँप्रतिको आकर्षण बढाएको छ। ग्रामीण पर्यटनबाट स्थानीय समुदायले थप लाभ लिन सक्ने अपेक्षा गरिएको छ।
