गत भदौ १० गते भोटेकोशी र त्रिशूली नदीमा आएको विनाशकारी बाढीका कारण भएको भौतिक तथा आर्थिक क्षतिका लागि बीमा कम्पनीहरूमा परेको मागदाबी २१ अर्ब रुपैयाँ पुगेको छ। नेपाल बीमा प्राधिकरणका अनुसार बीमा कम्पनीहरूमा २ हजार ४ सय २१ वटा दाबी दर्ता भएका छन्। ती दाबीबापत कुल २० अर्ब ९० करोड ४९ लाख रुपैयाँ अनुमानित क्षति भएको प्रारम्भिक विवरण प्राधिकरणमा पेस भएको छ।
दर्ता भएका दाबीमध्ये बीमा कम्पनीहरूले हालसम्म ८२ करोड १३ लाख ९० हजार रुपैयाँ अग्रिम तथा अन्तिम दाबी भुक्तानी गरिसकेका छन्। यो असोज ३० गतेसम्मको तथ्याङ्क हो। दसैँ बिदापछि कार्यालय खुलेकाले विवरण अद्यावधिक गर्न बाँकी रहेको प्राधिकरणले जनाएको छ।
सबैभन्दा धेरै आर्थिक क्षति सम्पत्ति बीमामा भएको छ भने दाबी सङ्ख्याका आधारमा मोटर बीमा अगाडि छ। सम्पत्ति बीमाअन्तर्गत ५७६ वटा दाबीमा ९ अर्ब ५६ करोड ३५ लाख रुपैयाँ अनुमान गरिएको छ, जसमध्ये १६ करोड २८ लाख रुपैयाँ भुक्तानी भएको छ। मोटर बीमातर्फ १ हजार ६७ वटा दाबीमा २ अर्ब ८४ करोड ८१ लाख रुपैयाँ अनुमान गरिएको छ र २३ करोड ६६ लाख रुपैयाँ भुक्तानी भएको छ।
कम्पनीगत रूपमा सबैभन्दा धेरै रकमको दाबी हिमालयन एभरेस्ट इन्स्योरेन्समा परेको छ, जहाँ २०९ वटा दाबीमा ६ अर्ब ६१ करोड ५५ लाख रुपैयाँ दाबी भएको छ र २३ करोड २३ लाख रुपैयाँ भुक्तानी भएको छ। सबैभन्दा धेरै रकम भुक्तानी गर्नेमा सगरमाथा लुम्बिनी इन्स्योरेन्स छ, जहाँ १ अर्ब ७५ करोड ९१ लाख रुपैयाँको दाबी परेकोमा २६ करोड ६३ लाख रुपैयाँ भुक्तानी भइसकेको छ।
प्राधिकरणले कम्पनीहरूलाई सर्भेयर खटाएर क्षति यकिन गर्न र अग्रिम भुक्तानी उपलब्ध गराउन निर्देशन दिएको थियो। बाँकी दाबीको मूल्याङ्कन प्रक्रिया अघि बढिरहेको छ।
