काठमाडौंको न्यूरोड क्षेत्रका व्यापारीहरू यस वर्षको दशैं र तिहारमा अपेक्षाअनुसार कारोबार नहुँदा आर्थिक चापमा परेका छन्। उनीहरूका अनुसार चाडपर्वको व्यापारले वर्षभरिका धेरै दायित्व मिलाउन सहयोग पुग्थ्यो, तर यसपालि त्यो अवस्था बनेन। बैंकको किस्ता, सटर भाडा, कामदारको पारिश्रमिक र उधारो कारोबारको हिसाब मिलाउन अहिले उनीहरूलाई कठिन भइरहेको छ।
व्यवसायी रविन्द्रकुमार बोहोराका अनुसार विगतमा चाडपर्वको डेढ महिनाजतिको कारोबारबाट करिब छ महिनासम्मका खर्च धानिन्थे। टाढाका व्यापारीसँगको लेनदेन मिलाउनेदेखि बैंक र घरधनीसँगका दायित्व पूरा गर्ने काम यही अवधिमा हुन्थ्यो। तर कोरोना महामारीपछि व्यापारमा आएको कमजोरी अझै सुधार हुन नसकेको र यस वर्षको चाडपर्वले पनि राहत नदिएको उनको भनाइ छ। महामारीपछि बैंकको ब्याजदर १५ देखि २० प्रतिशतसम्म पुगेको थियो।
अर्की व्यवसायी शान्ति उपाध्यायले व्यापार घटिरहँदा पनि सटर भाडा बढिरहेको बताइन्। उनका अनुसार भूकम्प, नाकाबन्दी र आन्दोलनजस्ता घटनाले पहिलेदेखि नै व्यापारमा असर पारेका थिए भने पछिल्लो समय भोटेकोशी क्षेत्रको घटनाले थप समस्या थपेको छ। प्रत्येक दुई वर्षमा भाडा बढ्ने र कतिपय अवस्थामा वृद्धि २० देखि ४० प्रतिशतसम्म पुग्ने उनले बताइन्। कर तिरे पनि कठिनाइका बेला राहत नपाएको उनको गुनासो छ।
व्यापारी नरेश कटुवालले बैंकमा रकम भए पनि कर्जा पाउन प्रक्रिया जटिल रहेको बताए। उनका अनुसार ब्याजदर घटेको भए पनि कर्जा उपयोग गर्न सहज छैन र घरभाडासम्बन्धी नियम पनि स्पष्ट छैन। उनले प्रतिवर्गफिटका आधारमा भाडा तय गर्ने वैज्ञानिक व्यवस्था, कम्तीमा दुईदेखि तीन वर्षको करार अवधि र ३५ दिने सूचनाका भरमा सटर खाली गराउने व्यवस्थामा सुधारको माग गरेका छन्। बोहोराले राज्य, बैंक र घरधनीबीच समन्वय गरेर भाडा र ब्याजमा सहुलियत दिनुपर्ने सुझाव दिएका छन्।
