गोरखाको बूढीगण्डकी नदीबीचको सानो टापुमा एउटा कुकुर १२ दिनदेखि अलपत्र छ। छङ्गाछुर भिरनजिकैको उक्त टापु चुमनुब्री गाउँपालिका–३ को जगत र धार्चे गाउँपालिका–१ को ठाडो भर्याङबीचको सीमा क्षेत्रमा पर्छ।
स्थानीयका अनुसार कुकुर ठाडो भर्याङका कमल कार्कीको हो। जंगलतिर भागेको कुकुर नदीको भंगालो पार गर्न नसकेर टापुमै थुनिएको छ। मनासलु पदमार्गका यात्रुहरूले १२ दिनदेखि टापुमा कुकुर देखिरहेका छन्।
स्थानीय वीरबल घलेले डुंगा प्रयोग गरेर उद्धार गर्न सकिने सुझाव दिएका छन्। उनका अनुसार टापु जाने सडक मर्मत भइरहेको छ र गाडी चलिरहेका छन्। सुरक्षाकर्मीसँग डुंगा हुन सक्ने भएकाले डुंगाबाट उद्धार गर्नु उपयुक्त हुने उनको भनाइ छ। हेलिकप्टरबाट उद्धार गर्दा खर्च धेरै लाग्ने उनले बताए।
टापु आसपास बाख्राहरू पनि अलपत्र छन्। असोज २५ को बाढीले केही बाख्रा बगाएको हुन सक्ने र केही वनतिर चरिरहेको देखिएको छ। स्थानीयले अन्य घरपालुवा पशुको पनि उद्धार गरिदिन आग्रह गरेका छन्।
यसअघि स्थानीयले वारिपट्टिबाट खानेकुरा फालेर पुर्याउने प्रयास गरे, तर खाना कुकुरसम्म पुगेन। स्थानीय कुशल घलेले कुकुर भोकै रहेकाले उद्धार गरिदिन अपिल गरेका छन्।
पर्यटन व्यवसायी तथा राष्ट्रिय स्वतन्त्र पार्टी चुमनुब्री अध्यक्ष धावा ग्याल्जेन लामाले कुकुरका तस्बिर सामाजिक सञ्जालमा राखेर उद्धारको अपिल गरेका छन्। उनले सम्भव भए आजै कैलास हेलिकप्टरमार्फत टापुमा खानेकुरा खसाल्ने प्रयास गरिने बताएका छन्। बूढीगण्डकीमा बाढी आएको १७ दिन भयो; बाढीले पुर्याएको क्षतिको मर्मत जारी छ।
