काठमाडौं, १० कात्तिक । मोबाइल वालेट सेवा खल्तीका कर्मचारी भएको दाबी गर्दै सर्वसाधारणसँग ठगी गर्ने चार जनालाई प्रहरीले पक्राउ गरेको छ । जिल्ला प्रहरी परिसर भक्तपुरको टोलीले उनीहरूलाई नियन्त्रणमा लिएको हो । पक्राउ पर्नेहरूमा सुभमकुमार झा, अनिकेतकुमार यादव, पवनकुमार चौधरी र रिशी गंगा रहेका छन् ।
प्रहरीका अनुसार उनीहरूले फोन तथा ह्वाट्सएपमार्फत मानिसहरूलाई सम्पर्क गर्ने र आफूलाई खल्तीका कर्मचारीका रूपमा चिनाउने गरेका थिए । केवाईसी विवरण अद्यावधिक गर्नुपर्ने र नत्र वालेट बन्द हुने भन्दै उनीहरूले सर्वसाधारणलाई झुक्याउने गरेका थिए । बैंक खाता वालेटसँग जोडिदिने, व्यापारिक खातामा रकम जम्मा हुँदा आवाज आउने ई-स्पिकर बनाइदिने र रकम पठाउँदा लाग्ने शुल्क हटाइदिने जस्ता कुरा गरेर उनीहरूले विश्वास जित्ने प्रयास गर्ने गरेका थिए ।
उनीहरूले अपनाउने तरिका फोनमा सम्पर्क गरेर सुरु हुने गरेको प्रहरीले जनाएको छ । सुरुमा आफूलाई कर्मचारी बताएपछि उनीहरूले केवाईसी र वालेटसम्बन्धी कुरा उठाउने गर्थे । त्यसपछि अडियो र भिडियो कलमार्फत कुरा गर्दै स्क्रिन सेयर गर्न लगाउने र त्यसक्रममा ओटीपी कोडसमेत लिने गरेको प्रहरीको भनाइ छ । यसरी बैंक खातामा अनधिकृत रूपमा पहुँच पुर्याएर उनीहरूले ठगी गर्ने गरेका थिए ।
