बाइटडान्सका संस्थापक झाङ यिमिङ कृत्रिम बौद्धिकता क्षेत्रमा कम्पनी विस्तार भएपछि चीनका सबैभन्दा धनी व्यक्ति बनेका छन् । हुरुन रिसर्च इन्स्टिच्युटको नयाँ सूचीले यस्तो देखाएको हो ।
हुरुनका अनुसार पाँच अर्ब युआनभन्दा बढी सम्पत्ति भएका चिनियाँ नागरिकको सङ्ख्या गत वर्षको तुलनामा ६.६ प्रतिशतले बढेर एक हजार ५२९ पुगेको छ । अमेरिकी डलरमा गरिएको गणनामा अर्बपतिको सङ्ख्या १५५ ले बढेर एक हजार १७६ पुगेको छ । हुरुनका अध्यक्ष रुपर्ट हुगेवर्फका अनुसार सूचीमा रहेका १६० जना, अर्थात् करिब १० प्रतिशतले, कृत्रिम बौद्धिकताबाट सम्पत्ति कमाएका छन् । बाइटडान्सको डुबाओ चीनमा सबैभन्दा धेरै प्रयोग हुने कृत्रिम बौद्धिकता सहायक हो । कम्पनीले डुइन र टिकटक पनि सञ्चालन गर्छ ।
बोतलको पानीको व्यवसाय गर्ने झोङ सानसानको सम्पत्ति २३ प्रतिशतले घटेर ६१ अर्ब अमेरिकी डलरमा सीमित भएपछि उनी दोस्रो स्थानमा झरेका छन् । विद्युतीय सवारीका लागि ब्याट्री बनाउने विश्वकै ठूलो कम्पनीका प्रमुख रोबिन जेङ तेस्रो स्थानमा छन् । कृत्रिम बौद्धिकता कम्पनी डीपसिकका संस्थापक लियाङ वेनफेङ सातौँ र कृत्रिम बौद्धिकता चिप निर्माता क्याम्ब्रिकनका अध्यक्ष चेन तियान्सी दसौँ स्थानमा छन् ।
कृत्रिम बौद्धिकता, अर्धचालक र रोबोटिक्स क्षेत्रका उद्यमीको सम्पत्ति बढे पनि उपभोक्ता र घरजग्गा क्षेत्रका व्यवसायीको सम्पत्ति घटेको छ । चिनियाँ विद्युतीय सामग्री निर्माता साओमीका अध्यक्ष लेइ जुनको सम्पत्ति आधा घटेर २५ अर्ब १० करोड अमेरिकी डलरमा झरेको छ । पहिलोपटक चीनको मुख्यभूमिमा आधारित कुनै पनि घरजग्गा विकासकर्ता शीर्ष १०० धनीको सूचीमा परेका छैनन् । चीनको अर्थतन्त्र जुलाईदेखि सेप्टेम्बरसम्म अघिल्लो वर्षको सोही अवधिको तुलनामा ४.५ प्रतिशतले बढेको थियो । चीनको यस वर्षको वृद्धि लक्ष्य ४.५ देखि पाँच प्रतिशत छ ।
