नेपालमा फुटबलको नयाँ प्रतियोगिता सुरु हुने खबर सार्वजनिक भएलगत्तै त्यसलाई लिएर विवाद देखिएको छ। नेपाल सुपर लिगले मंगलबार विज्ञप्ति निकालेर आफूले अर्को कुनै लिग सञ्चालन गर्न अनुमति नदिएको जनाएको छ। उसले आफूलाई देशभर सञ्चालन हुने र सहरमा आधारित फुटबल प्रतियोगिता आयोजना गर्ने मान्यता प्राप्त एक मात्र निकायका रूपमा प्रस्तुत गरेको छ।
नेपाल फुटबल लिगको पहिलो संस्करण आगामी फागुन १ देखि सुरु गर्ने तयारी भएको खबर आएपछि नेपाल सुपर लिगले प्रतिक्रिया दिएको हो। यसअघि सुपर लिगमा खेल्दै आएका सात वटा फ्रेन्चाइज टोली नयाँ लिगमा सहभागी हुने तयारीमा रहेकाले विवाद उठेको हो। ती टोलीमा काठमाडौं रेजर्स, ललितपुर सिटी, एफसी चितवन, पोखरा थन्डर्स, बुटवल लुम्बिनी, धनगढी एफसी र झापा एफसी रहेका छन्।
विज्ञप्ति नेपाल सुपर लिगका प्रबन्ध निर्देशक श्रेयन्स कार्कीले जारी गरेका हुन्। त्यसमा नेपाली फुटबलको विकासका लागि आफ्नो दीर्घकालीन योजना, अधिकार र जिम्मेवारीप्रति प्रतिबद्ध रहेको उल्लेख छ। नयाँ लिगबारे थप धारणा बनाउने र आगामी कदम तय गर्ने काम भइरहेको र विस्तृत जानकारी पछि सार्वजनिक गरिने पनि जनाइएको छ। खेलाडी र समर्थकको हितलाई केन्द्रमा राखेर सहकार्य र आपसी सम्मानका साथ अघि बढ्नुपर्ने धारणा पनि विज्ञप्तिमा राखिएको छ।
अखिल नेपाल फुटबल संघमाथि फिफाले लगाएको निलम्बनपछि घरेलु फुटबल प्रतियोगिताको भविष्यबारे अन्योल छ। सरकारी हस्तक्षेप भएको भन्दै फिफाले निलम्बन गरेपछि यसअघि सञ्चालन हुँदै आएको सुपर लिगसमेत प्रभावित भएको थियो। त्यसै पृष्ठभूमिमा नयाँ लिगको तयारी र त्यसप्रतिको असन्तुष्टि सार्वजनिक भएको हो।
