चालु आर्थिक वर्ष २०८३/८४ को पहिलो तीन महिनामा वैदेशिक रोजगारीका लागि दुई लाखभन्दा धेरै नेपाली बाहिरिएका छन्। वैदेशिक रोजगार विभागको तथ्यांकअनुसार साउन, भदौ र असोजमा गरी २ लाख ४ हजार २४८ जनाले अन्तिम श्रम स्वीकृति लिएका छन्।
मासिक रूपमा हेर्दा साउनमा ७० हजार ४४१ र भदौमा ६० हजार ४२ जनाले स्वीकृति लिएका थिए। भदौमा संख्या केही घटेको भए पनि असोजमा भने साउन र भदौ दुवै महिनाको तुलनामा बढी स्वीकृति जारी भएको छ। असोजमा मात्र ७३ हजार ७६५ जनाले स्वीकृति लिए, जसमध्ये पुरुष ६३ हजार ३७७ र महिला १० हजार ३८८ छन्। तीमध्ये नयाँ स्वीकृति लिने ४३ हजार ५५९ र बिदामा आएर पुनः जाने ३० हजार २०६ छन्।
गन्तव्यका आधारमा संयुक्त अरब इमिरेट्स (यूएई) पहिलो रोजाइ बनेको छ। असोजमा यूएईका लागि २३ हजार ८९९, कतारका लागि ११ हजार ४९७, मलेसियाका लागि ९ हजार ६५३, साउदी अरेबियाका लागि ८ हजार ३६६ र कुवेतका लागि ५ हजार २७ जनाले स्वीकृति लिए। रोमानियाका लागि २ हजार ४७८ र जापानका लागि १ हजार ४९५ जनाले स्वीकृति लिएका छन्।
असोजमा सीपका आधारमा दक्ष श्रमिक ४० हजार ७००, अदक्ष २० हजार २२८, अर्धदक्ष १२ हजार ३४२, व्यावसायिक जनशक्ति ४१५ र उच्च दक्ष जनशक्ति ८० जना छन्। असोजमा जिल्लागत रूपमा झापाबाट सबैभन्दा धेरै ३ हजार ४९०, धनुषाबाट ३ हजार ३२६ र मोरङबाट ३ हजार १७७ जनाले स्वीकृति लिएका छन्।
